Prezidente Partidu Demokatiku, Mariano Assanami Sabino no Prezidente Komisáriu Polítika Nasionál PD, Adriano do Nascimento kaer liman iha sede PD, Kolmera, Dili, segunda (10/01). Imajen Tatoli/Natalino Belo.

DILI, 10 janeiru 2022 (TATOLI) – Partidu Demokrátiku (PD) sei deside entre Mariano Assanami Sabino no Adriano do Nascimento iha 15 janeiru hodi kompete iha eleisaun prezidensiál períodu tinan 2022-2027.

Sekretáriu Jerál PD, António da Conceição ‘Kalohan’ hateten, Timor-Leste sei komemora tinan 20 restaurasaun independénsia 20 maiu, ne’ebé hamriik nu’udar nasaun liuhosi ezersísiu podér iha órgaun soberanu sira hanesan Prezidente Repúblika, Parlamentu Nasionál, Governu no Tribunál.

“PD liuhosi nia órgaun konsellu superiór iha reuniaun iha loron 6 no loron 7 fulan-janeiru simu disponibilidade kandidatu na’in-rua ne’ebé prontu atu kompete iha partidu liuhosi konvensaun nasionál ne’ebé mak sei realiza iha loron 15 janeiru hodi sai nu’udar kandidatu nasionál hosi partidu nian,” Sekretáriu jeral PD hateten iha kolmera, segunda ne’e.

Sekretáriu Jerál PD, António da Conceição hamutuk ho kuadru polítiku PD nian hala’o konferénsia imprensa iha sede PD, Kolmera Dili, segunda (10/01). Imajen Tatoli/Natalino Belo.

Kandidatu rua ne’e mak hanesan atuál Prezidente Partidu Demokrátiku, Mariano Assanami Sabino no Adriano do Nascimento atuál Prezidente Konsellu Polítiku Nasionál PD.

Kandidatu Partidu Demokrátiku na’in-rua ne’e sei hala’o sira-nia debate iha loron 15 janeiru hodi aprezenta sira-nia vizaun ba partisipante sira hodi hili demokratikamente nu’udar kandidatu nasionál atu kompete ho kandidatu seluk iha eleisaun prezidensiál 2022-2027.

PD mós la taka dalan ba militante no kuadru polítiku sira-ne’ebé iha disponibilidade atubele rejista bainhira hakarak atu kompete iha konvensaun partidu nian ne’e.

Mekanismu iha konvensaun, kandidatu sira sei debate hodi hato’o vizaun kona-ba kna’ar Prezidente Repúblika nian.

Iha konvensaun ne’e mós sei partisipa hosi kuadru polítiku nasionál no munisipiu hodi hili demokratikamente kandidatu Prezidente Repúblika ne’ebé sei reprezenta PD no rejista iha Tribunál Rekursu iha loron 4 fevereiru tinan 2022.

“PD iha kongresu liubá altera estatutu hodi hamosu mekanismu importante hodi hametin demokrasia hahú hosi partidu hodi sai ba li’ur, tanba ne’e mak konvensaun nasionál nu’udar mekanismu ida hodi fixa kandidatu nasionál,” António esplika.

Rezultadu konvensaun 15 janeiru ne’e sei fó-sai ba públiku iha loron sábadu, 20 janeiru 2022.

Kalohan akresenta, PD sei esforsu atu fó vitoria ba kandidatu nasionál hodi sai Prezidente Repúblika ba povu tomak maibé bainhira la tama iha ronde daruak PD sei liuhosi enkontru deside ba kandidatu seluk ne’ebe serbí estadu.

Kandidatu Mariano Assanami Sabino, hateten, PD nu’udar partidu ne’ebé tuan hafoin FRETILIN tanba ne’e iha devér prontu ba estadu nune’e kandidatu ne’ebe iha la’ós de’it PD nian maibé kandidatu povu tomak nian.

“PD nia kandidatu sei kandidatu povu nian atu sai Prezidente Repúblika ba povu, husu ba líder no partidu polítiku hotu-hotu atu apoia,” Assanami akresenta.

Adriano do Nascimento, reforsa, Partidu Demokrátiku tenke dinamiza demokrasia iha interna partidu nian no nasaun ne’ebé ho prinsípiu ida de’it atu serbí maibé tenki ta’is liuhosi mekanismu demokrasia atu nune’e demokrasia bele la’o tuir povu nia hakarak.

“Ami na’in-rua líder PD, fundadór partidu tanba ne’e ami mosu atu dinamiza demokrasia iha PD no nasaun tanba ne’e laiha hanoin katak manán ka lakon, lakon ka manan ne’e líder PD. Eleisaun Prezidensiál la’ós objetivu úniku PD tama iha batalla politika iha nasaun ida-ne’e, objetivu ikus liu mak eleisaun parlamentár,” Adriano esplika.

Antes ne’e, Prezidente Repúblika, Francisco Guterres ‘Lú Olo’ rona ona hanoin hosi governu no partidu polítiku iha asentu parlamentár molok dekreta loron eleisaun prezidensiál.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here