Mariano Assanami Sabino. Imajen Tatoli/António Gonçalves.

DILI, 19 outubru 2021 (TATOLI)—Prezidente Partidu Demokrátiku (PD), Mariano Assanami Sabino, hateten Partidu Demokrátiku (PD) preparadu atu tuir no hasoru eleisaun prezidensiál ne’ebé sei akontese iha tinan 2022.

“PD sempre, regularmente, kada tinan lima sempre prepara an ba eleisaun prezidensiál no eleisaun parlamentá, Ne’ebé, preparasaun internál iha hela maibé ita sei hein bainhira mak Prezidente Repúblika dekreta kalendáriu ba eleisaun,” Prezidente PD, Mariano Asanami Sabino, hateten ba Agência Tatoli, iha Parlamentu Nasionál, tersa ne’e.

PD durante ne’e, nia preparasaun internál ho Komisaun Nasionál Eleisaun (CNE, siglá portugés) ba fiskalizasaun nian, maibé hosi PD nian rasik iha estrutura sira iha baze, prepara halo servisu konsolidasaun no estabelese estrutura 88 iha aldeia sira iha territóriu nasionál.

“Normalmente atividade partidu la’o la’ós tanba hasoru eleisaun prezidensiál de’it maibé sistemátikamente la’o hela,” nia dehan.

Instrumentu sira-ne’e hanesan mákina partidu atu ba halo kampaña, sensibilizasaun no apoiu kandidatura prezidente.

Partidu Demokrátiku (PD) nu’udar partidu demokrátiku loké dalan hotu-hotu iha oportunidade nia kuadru atu sai kandidatu ba Prezidente Repúblika maibé sei liu hosi konferénsia partidu nian mak sei deside hodi oferese kandidatu ne’ebé hosi PD maibé ne’e kandidatu povu nian.

Tanba ne’e, nia dehan, Partidu Demokráriku respeita Prezidente Repúblika dekreta kalendáriu eleisaun nian sai ona mak foin hala’o atividade legalmente liu-liu ba eleisaun prezidensiál.

“Bainhira kalendáriu sai ona mak PD sei halo konferénsia hodi deside kandidatu Prezidente Repúblika PD nian ne’ebé oferese ba povu tomak,” Prezidente PD ne’e hateten.

Bainhira PR dekreta ona kalendáriu eleisaun mak militante Partidu Demokrátiku sempre prontu bainhira deside ona hosi konferénsia hodi esforsu fó vitória ba kandidatura Prezidente Repúblika.

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here