Inan-feton ida aprezenta hela oinsá soru-tais bainhira partisipa iha serimónia rekoñesimentu UNESCO ba tais Timor-Leste nu’udar patrimóniu kulturál immateriál mundiál, iha Salaun Suai, Timor Plaza, Dili, segunda (20/12/2021). Imajen Tatoli/António Gonçalves.

DILI, 20 janeiru 2022 (TATOLI)—Diretór Jerál Arte no Kultura, Manuel Ximenes Smith, informa SEAK sei halo sensibilizasaun no fó formasaun tais ba jerasaun foun, nune’e sira bele komprende konaba prosesu soru tais to’o podús tais ida.

Notísia Relevante: PM lansa rekuñesimentu “tais” sai patrimóniu kulturál mundiál

“Iha planu salvaguarda urjente ne’e mós ita sei sensibiliza tais liuhosi televizasaun, formasaun ba jerasaun foun sira, brousura ba merkadória, aeroportu no fatin públiku. Alende ne’e, ita sei halo sensibilizaun tais ba iha prosesu elaborasaun kurikulu ba iha estudante sira, sensibilizasaun tais ba iha prosesu marketing nomós prepara kompetisaun tais,” Manuel Smith hateten ba Agência Tatoli, iha nia knar fatin, Avenida Portugál, kinta ne’e.

Ho manira ida-ne’e atu nafatin halo inovasaun ba iha jerasaun foun sira sai hanesan kontinuadór ida ba prosesu sustentabilidade ba iha soru tais no halo transmisaun, nune’e jerasaun foun sira bele komprende kle’an konaba soru tais ne’e rasik.  

Programa sensibilizasaun ne’e sei hala’o iha 2022 to’o 2025, tanba tais ne’e hetan ona rekuñesimentu hosi UNESCO Paris, nune’e TimorLeste hetan orsamentu hamutuk rihun $265 atu halo planu salvaguarda durante tinan tolu nia laran.

Aleinde ne’e, SEAK sei loke vaga ba ekipa servisu ba project manager ida, tekniku administrativu rua no tezoreiru ida, hamutuk ema na’in-haat atu haree konaba planu salvaguarda ne’e rasik.

“Agora dadaun, MTCI halo ona tais ba iha farda itania estudante no funsionáriu sira, ida-ne’e hola parte ba planu salvaguarda ne’ebé sira hahú ona. Maibé, SEAK, SEII no sira seluk ita hein orsamentu rihun $265 hosi UNESCO Paris, atu ita implementa iha janeiru ne’e, maibé orsamentu ida-ne’ebé mak tais hetan aprovasaun ne’e seida’uk aloka mai iha TimorLeste. Se osan ne’e iha ne’e ona planu salvaguarda ita halo ona, tanba planu salvaguarda ne’e tama ona iha rekejitu importante ida-ne’ebé hetan aprovasaun iha tais ne’e rasik,” nia dehan.

Tanba, ko’alia kontestu tais iha prosesu nomeasaun ida-ne’e tais tama iha lista salvaguarda urjente ne’e, signifika katak tenke halo preparasaun ba planu salvaguarda urjente ba tais ne’e.

“Entaun, iha programa salvaguarda urjente tais ba 2022 to’o 2025, liña Ministeriál hanesan Ministériu Ensinu Superiór Siénsia no Kultura, SEAK, MTCI, SEII, Komisaun Nasionál UNESCO, Timor Aid, Fundasaun Alola no UN Women, ita prepara tiha ona plataforma liga ba planu salvagurda urjente atu haree konaba uzu de kustume liga ba ema entidade hotuhotu fó ona nia konsiderasaun no fó ona nia kontribuisaun ba iha prosesu valorizasaun tais nu’udar itania patrimóniu kulturál no immateriál,” nia informa.

Nune’e, haree ba prosesu evolusaun liuhosi globalizasaun teknolojia iha infiltrasaun tais barak tama iha Timor tanba TimorLeste hanesan fatin ne’ebé sai nu’udar merkadu internasionál no daudaun fatin no ema hotu lori sirania matenek modernu hodi prodús obra oioin no mós bele kopia tais Timor ho lais.

Nune’e, iha rejime juridiku númeru 33/2017, ko’alia konaba rejime juridiku, partimóniu kulturál materiál no immaterial ne’ebé ko’alia kle’an konaba oinsá atu fó protesaun ba patrimónia eransa kulturál hotuhotu inklui tais.

“Entaun, ida-ne’e mós la to’o tanba ita tenke hamosu filafali oinsá lei balun ne’ebé mak atu bele asegura ema nia obra. Tanba, ita hatene katak, iha tinan rua tutuir malu ba halo diskusaun orsamentu 2019, 2020, 2021 no 2022, ita ba halo audiénsia públika ho itania Prezidente Komisaun G, Antóniu Verdiál, nia mós halo pronúnsia ona konaba prosesu elaborasaun lei direitu de autór ne’e. Hakarak ka lakohi, TimorLeste sai hanesan Nasaun foun ida no ema hotuhotu uza nia matenek atu ultrapasa hodi halakon, hanehan no desvaloriza ema nia obra sira seluk,” nia afirma.

Ezemplu, xinéza sira halo Tais, se ko’alia konaba rejime juridiku númeru 33/2017 atu haree konaba patrimóniu kulturál materiál no immateriál en jerál no la espesifiku ba iha ema-nia obra, entaun atu haree ba kestaun ida-ne’e tenke prodús lei ida atu asegura ema-nia obra liuhosi lei direitu de autór.

Notísia Relevante: 16 Dezembru, UNESCO sei anunsia “Tais” sai Patrimóniu Kulturál-Immateriál mundiál

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here