Inan-feton ida aprezenta hela oinsá soru-tais bainhira partisipa iha serimónia rekoñesimentu UNESCO ba tais Timor-Leste nu’udar patrimóniu kulturál immateriál mundiál, iha Salaun Suai, Timor Plaza, Dili, segunda (20/12/2021). Imajen Tatoli/António Gonçalves.

DILI, 20 dezembru 2021 (TATOLI)—Primeiru-Ministru (PM), Taur Matan Ruak, segunda (20/12) ne’e halo lansamentu kona-ba Organizasaun Nasaun Unida ba Edukasaun Siénsia no Kultura (UNESCO, sigla inglés) iha Paris rekoñese ona Tais Timor-Leste sai Patrimóniu Kulturál no Immateriál mundiál.

Notísia Relevante: PN kongratula “Tais” sai patrimóniu mundiál, Governu tenke deside loron nasionál ba “Tais”

Xefe Governu ne’e hato’o parabéns ba soru-na’in sira-ne’ebé jerasaun ba jerasaun mantein nafatin prátika soru tais to’o ohin loron, tanba rekoñesimentu “tais” ida-ne’e monu loos iha momentu ida-ne’ebé kuaze tendénsia adultera Timor nia tais, tanba benefisiu ekonomiku la’o makas los.

Primeiru-Ministru, Taur Matan Ruak. Imajen TATOLI/António Gonçalves

“Se ita haree didi’ak tais, ita-nia tais ne’e kuaze nia utilidade barak loos hanesan ita simu bainaka sira, nune’e mós iha serimónia kulturál sira hanesan katuas sira hatun feto foun, simu mane foun no ita mate mós ita sei presiza tais nafatin. Entaun, tais ne’e simbolizmu kulturál, valór sosiál no ekonomiku ne’e boot. Entaun, rekoñesimentu ida-ne’e ba ita momentu ida-ne’ebé ita simu ho orgullu loos, tanba ita nunka espera katak momentu ida-ne’e bele to’o,” Taur Matan Ruak, hateten liuhosi ninia diskursu iha serimónia lansamentu kona-ba UNESCO Paris rekuñese ona Tais Timor-Leste sai Patrimóniu Kulturál no Immateriál mundiál, ne’ebé hala’o iha Timor Plaza, segunda ne’e.

Ida-ne’e foin hahú maibé ba oin sosiedade no joven sira bele koñese, valoriza no bele hatutan atu tradisaun soru-tais ne’e labele lakon, tanba tais ne’e mós reprezenta Timor nia kulturál kada grupu etniku ida, hanesan iha munisípiu sira ida-idak iha ninia tais rasik. 

“Husu ba kada grupu etniku ka grupu ida kontinua nafatin prezerva ida-ne’e, tanba ida-ne’e importante loos,” nia dehan.

Iha biban ne’e, Primeiru-Ministru hato’o mós parabéns ba grupu sira hanesan Fundasaun Alola, Timor Aid, Sekretária Estadu Igualdade no Inkluzaun (SEII) no UN Women, ne’ebé mak halo ona nia kontribuisaun ba rekoñesimentu Tais ne’e. 

“Sira hotu ne’ebé fó ona nia kontribuisaun Governu agradese no Governu promete ba oin kontinua nafatin servisu hamutuk ho organizasaun sira hotu ne’ebé interresadu atu apoia di’ak liután ba ita-nia inan-feto sira, liu-liu ba sira-ne’ebé dedika sira-nia tempu no sira-nia servisu ba soru tais,” nia hateten.

Sekretáriu Estadu Arte no Kultura (SEAK), Teófilo Caldas, agradese ba inan-feton soru-na’in sira no UNESCO iha Paris, tanba valóriza, aprova no rekuñese ona Tais Timor-Leste sai patrimóniu mundiál.

Atu atividade soru tais ne’e labele lakon, nia hateten, iha Sekretáriu Estadu Arte no Kultura servisu hamutuk ho parseriu dezenvolvimentu sira oinsá atu fó formasaun ba jerasaun foun sira ne’ebé mak seidauk hatene kona-ba soru tais ne’e. 

“Ami iha ona proposta rua ka tolu, liu-liu munisípiu Aileu sira iha tais, maibé sira laiha ema soru-na’in. Entaun, ita hakarak atu finansia sira, liu-liu ita fó orsamentu liuhosi empreza sira hodi fó formasaun ba ita-nia soru-na’in sira,” nia dehan.

Tanba, nia dehan, Timor-Leste nia tais kuandu hetan ona aprovasaun no rekuñesimentu iha UNESCO Paris, entaun Timor-Leste mós bele tama ona iha merkadu mundiál.

Primeiru-Ministru, Taur Matan Ruak, akompañadu hosi Sekretáriu Estadu Arte no Kultura, Teófilo Caldas, observa hela inan-feton ida aprezenta soru tais, bainhira partisipa iha serimónia rekoñesimentu UNESCO ba tais nu’udar patrimóniu kulturál immateriál, iha salaun Suai, Timor Plaza, segunda (20/12/2021). Imajen Tatoli/António Gonçalves.

“Entaun, ita tenke prepara ita-nia kuantidade ho kualidade, tanba bainhira ita garante nia kualidade ita mós garante nia kuantidade. Bainhira iha demanda ruma, ita tenke halo esportasaun ba ita-nia tais, maibé to’o agora ami seidauk simu nasaun balun hato’o sira-nia proposta mai,” Governante ne’e informa.

Maibé, nia hateten, importante mak halo preparasaun oinsá fó formasaun ba jerasaun foun Timor-Leste ni’an, atu bainhira inan-feton soru-na’in sira kuandu laiha, sira mós bele hatene ona soru tais ne’e. 

Embaixadór Amerika iha Timor-Leste, Tom Daley, kongratula Timor-Leste tanba inskreve ona Tais nu’udar Patrimóniu Kulturál Immateriál mundiál. 

“Ne’e primeira-vez ba nasaun ida-ne’e no nu’udar momentu istóriku signifikante ida, momentu orgullu nasionál no susesu boot ida ba povu Timor-Leste,” nia dehan.  

Ida-ne’e hatudu rekoñesimentu internasionál ba Tais nia importánsia kulturál ba Timor-Leste, no kontribuisaun importante hosi inan-feton sira-ne’ebé mak kria ona tais furak ida-ne’e.

“Ami espera katak rekuñesimentu internasionál ne’e sei aumenta liután ema-nia interese ba tais no ba Timor-Leste ne’ebé bele ajuda apoia família sira-nia moris iha Timor laran tomak iha jerasaun sira tuir mai,” nia dehan.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here