EDTL Bobonaro prepara reinstala kontadór iha postu administrativu haat. Imajen Tatoli/Sérgio da Cruz.

BOBONARO, 20 janeiru 2022 (TATOLI) – Eletrisidade Timor-Leste, Empreza Públika (EDT, E.P, sigla portugés) Munisípiu Bobonaro, prepara reinstala kontador 1.700 ba kliente sira-nia uma iha postu administrativu haat.

Supervizór EDTL, E.P Munisípiu Bobonaro, Mário de Jesus, informa, iha tinan kotuk tékniku sira halo ona re-intsalasaun kontadór 1000 iha postu administrativu Maliana no Balibo, maibé daudaun ne’e sei kontinua kobre ba kliente sira iha postu administrativu Atabae, Cailaco, Lolotoe no Bobonaro.

“Ami hetan distribuisaun kontadór 1.700 hosi nasionál, agora ita-nia tékniku sira hahú kedas semana dahuluk fulan ne’e tama sai uma halo hela re-instalasaun kontadór iha postu Atabae no sei kontinua mós ba komunidade sira iha Bobonaro no seluk tán,” Supervór ne’e informa ba Agência TATOLI liuhosi telefónika, kinta ne’e.

Notisia relevante:EDTL, EP hahú reinstala kontadór iha Maliana

Atividade re-instalasaun gratuita ba kliente sira ho kategoria sosiál, doméstika no komérsiu ne’ebé durante ne’e sei utiliza de’it Maniature Curcuit Breaker (MCB, sigla inglés), nune’e kliente sira bele jere utilizasaun enérjia eletrika tuir nesesidade no kontribui taxa ba kofre estadu.

Purtantu durante atividade ne’e iha terrenu, EDTL,E.P  mós simu keixa, lamentasaun no krítika  hosi kliente  sira, liuliu kliente domestika katak bainhira konklui reintasalaun volume enérjia ladún forte no ko’a saldo maka’as halo kliente sira labele utiliza ekipamentu eletróniku barak.

Tanba ne’e jerente ne’e esplika, bazea ba regra kliente ne’ebé halo negósiu mai rejista ho kategoria komérsiu, tékniku sira instala tuir nesesidade, ba sira-ne’ebé halo negósiu kiik hanesan loke kioske kategoria (C1) halo ligasaun ho ninia kilowatt (KW) 0,10.

Nune’e mós kliente sira-ne’ebé loke loja, mebel ho kategoria (C2) no nia ligasaun kilowatt 0,15, enkuantu ba kliente ne’ebé loke loja boot sira kategoria (C3) sei hetan ligasaun kilowatt 0,24.

“Ahi ne’e la forsa, tanba kliente sira uluk rejista kategoria doméstika, maibé ami halo reinstalasaun prepagu foun, ami identifika sira loke fali atividade hanesan kioske, mebel, entaun ida-ne’e ita kategoria komérsiu, ne’ebé nia tenke ko’a pulsa maka’as duni,” nia fundamenta.

Enkuantu kliente munisípiu Bobonaro ne’ebé asesu enérjia eletrisidade hamutuk 15.921. Hosi númeru ne’e tékniku sira deteta 5% mak halo ligasaun direita tanba durante pandemia Covid-19 limita komunidade sira-nia moveimentu halo atividade negósiu.

Notisia relevante: EDTL Bobonaro rekolla reseita $470,495.88

Ikusliu supervizór ne’e husu ba kliente sira atu kontribui selu taxa ba estadu, tanba bazea ba dekretu-lei númeru 33/2016, 17 agostu, kona-ba Regulamentu Lisensiamentu ba Enérjia Elétrika no Tarifa, inklui koima sira katak kliente hotu bainhira uza enérjia tenke selu.

Enkuantu iha tinan 2021 EDTL,EP munisípiu Bobonaro rekolla reseita $433.743,53 ba kofre estadu.

Jornalista         : Sérgio da Cruz

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here