Tékniku EDTL, EP Bobonaro halo hela re-instalasaun kontadór iha komunidade sira-nia uma. Imajen Tatoli/Sérgio da Cruz.

BOBONARO, 25 novembru 2021 (TATOLI) – Eletrisidade Timor-Leste, Empreza Públika (EDTL, EP), Munisípiu Bobonaro, hahú halo reinstalasaun kontadór iha bairu-bairu ne’ebé pertense ba postu administrativu Maliana tanba kontadór tuan ona no evita inséndiu.

Supervizór EDTL, EP Munisípiu Bobonaro, Mário de Jesus, informa, atividade ne’e hahú iha loron 8 novembru konsege reinstala ona kontadór unidade 634 iha kliente sira-nia uma.

“Ita halo reinstalasaun ba komunidade ne’ebé uza hela ampére ka Miniatur Circuit Breaker (MCB), no ba kliente ne’ebé mak durante ne’e uza hela prepagu aat hodi halo ligasaun direita, inklui ba komunidade ne’e nia uma seidauk monta kontadór,” nia informa ba  Agência Tatoli, kinta ne’e.

Kontadór nu’udar instrumentu ida atu jere utilizasaun enérjia eletrisidade, bainhira kliente sira utiliza ona sei sosa pulsa no halo pagamentu direita iha edifísiu EDTL,EP.

Iha fulan ne’e, atividade reinstalasaun sei konsentra de’it iha postu administrativu Maliana, maibé tuir planu sei kontinua ba postu administrativu Cailaco no sei abranje ba kliente hotu iha Bobonaro laran nune’e kontribui reseita ba estadu no evita risku inséndiu.

“Prepagu ne’e EDTL,EP nasionál prepara mai hamutuk unidade 2.861, maibé  distribui mai ne’e unidade 1.000 mak uluk, tuir planu sei distribui tán 1.861 atu kobre hotu munisípiu Bobonaro,” nia subliña.

Dadaun ne’e tékniku EDTL, EP Bobonaro halo hela manutensaun ba liña eletrisidade média no baixa tensaun inklui fider hirak-ne’ebé sempre avaria iha kapitál Maliana, nune’e garante komemorasaun loron Proklamasaun Independénsia 28 Novembru ba-dala 46 iha munisípiu Bobonaro.

“Ita garante katak ahi sei la mate no lakan hanesan normál, tanba ha’u orienta tékniku sira mantein durante loron boot, avaria karik ita bele halo intervensaun lalais atubele realiza serimónia ne’e ho di’ak,” Supervizór EDTL, EP Munisípiu Bobonaro ne’e hateten.

Tuir observasaun Agência Tatoli iha terrenu, alende halo reinstalasaun, tékniku EDTL sira mós monitoriza ba komunidade ne’ebé halo ligasaun ilegál. Bainhira identifika tékniku sira desliga kedas no haruka kliente ne’e ba presta deklarasaun iha edifísiu EDTL, EP Bobonaro aplika multa hafoin fó lisensa halo ligasaun.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here