Edifísiu Eletrisidade Timor-Leste, Empreza Públika (EDTL,EP) Munisípiu Bobonaro. Imajen Tatoli/Sérgio da Cruz.

BOBONARO, 23 dezembru 2021 (TATOLI) – Eletrisidade Timor-Leste, Empreza Públika (EDTL.EP), munisípiu Bobonaro rekolla reseita $470,495.88 ba kofre estadu hahú hosi fulan- janeiru to’o novembru tinan 2021.

Supervizór EDTL,EP Munisípiu Bobonaro, Mário de Jesus, hateten, reseita hirak-ne’e kontribui hosi kliente sira kategoria doméstika, sosiál no barakliu hosi kategoria komersiál.

“Ita-nia reseita ne’e iha $393,217.66, fahe ba nova ligasaun pre-pagu $8,126.05, nova ligasaun Pós-pagu $21,431.12, ba konvensionál ne’ebé selu iha banku hamutuk $47,720.06 no totál reseita fulan 11 mak $470,495.88 maibé dezembru nian ami seidauk konta,” nia informa ba Agência TATOLI, iha kna’ar-fatin,Maliana, kinta ne’e.

Maske kada tinan EDTL, EP aplika selu taxa enérjia elétrika ba kliente hotu kada kategoria, maibé tuir dadus instituisaun estadu iha munisípiu Bobonaro barak mak seidauk selu taxa, maske tékniku sira halo ona instalasaun pós-pagu iha edifísiu hotu.

Enkuantu durante ne’e EDTL,EP Bobonaro rejista Hospital Referál Maliana (HRM) de’it mak kada-fulan kontribui taxa ba estadu, maske lei hateten instituisaun estadu hotu iha obrigasaun atu selu taxa ba EDTL, EP.

“Ami hasai leitura ba sira-ne’ebé mak ema dehan KW Pós-pagu, ne’ebé kada fulan-ida Hospital Referál Maliana selu rihun $3. ba leten, maibé depende ba sira uza ahi, sei ahi mate kleur selu taxa mós menus,” nia esplika.

Entretantu supervizór ne’e promete durante selebrasaun Natál ho tinan foun, EDTL,EP sei fornese enérjia eletrisidade ba komunidade lakan 24 oras nia laran, bainhira laiha impaktu husi dezastre naturál.

Totál funsionáriu EDTL,EP Bobonaro hamutuk na’in-20, na’in-tolu konsentra iha edifósiu trata asuntu administrasaun, restante tékniku iha munisípiu inklui destaka iha postu administrativu sira.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here