Kandidatu Prezidente Republika, Armanda Berta dos Santos. Imajen Tatoli/Francisco Sony.

DILI, 20 janeiru 2022 (TATOLI)—Prezidente Partidu Kmanek Haburas Unidade Nasionál Timoroan (KHUNTO), Armanda Berta dos Santos, kinta ne’e ofisialmente deklara ba públiku kandidata an ba Prezidente Repúblika periódu 2022-2027, hodi kompete iha eleisaun prezidensiál iha tinan ne’e.

Notísia Relevante: Armanda Berta ofisialmente deklara kandidata an ba Prezidente Repúblika

Armanda Berta, deklara nia kandidatura ho lema “Ha’u Berta imi tau fiar ba ha’u, ha’u fiar ba imi hodi servi nasaun Timor-Leste-Leste”, ne’ebé sei hala’o kna’ar tuir de’it konstituisaun RDTL haruka.

“Ohin, ha’u hakarak hato’o ba públiku kona-ba kandidatura ba Prezidente Repúblika iha eleisaun prezidensiál 2022. Kompromte ba povu katak sei kaer metin ba konstituisaun no prinsípiu fundamentál sira hanesan hametin Estadu direitu demokrátiku no hametin pás no estabilidade atu nune’e ita-nia dezenvolvimentu bele la’o ba oin ho sustentavel,” Armanda Berta deklara iha salaun Esperansa, Delta, Dili.

Nia hakarak kandidata an iha prosesu demokrátiku ne’e, hodi servi nasaun no povu tomak no nia sei hala’o Prezidente Repúblika nia knar hodi hametin relasaun di’ak ho ita-nia nasaun viziñu no mós nasaun sira seluk iha mundu hodi habelar polítika externa Timor-Leste ninian.

Atual Vise Primeiru Ministru ne’e hateten, estabilidade iha Timor-Leste ida-ne’e importante tebes tanba ne’e presiza hatuur didi’ak kompeténsia órgaun soberanu sira-nian no tenke hametin interdepedénsia órgaun Estadu ho di’ak no presiza Governu ida estável hodi bele halo dezenvolvimentu iha nasaun ba oin.

Nia dehan, iha tinan hirak ne’e mundu hotu hasoru COVID-19 ne’ebé fó impaktu makaas ba ekonomia no ema barak lakon vida, maibé Timor-Leste bele salva an iha krize hirak ne’ebé hasoru iha tinan hirak nia laran.

Nune’e, Armanda Berta dos Santos, louva povu Timor-Leste ninia maduru hodi fó liman ba malu iha situasaun saida de’it, nune’e enkoraja ita hotu nafatin partisipa prosesu demokrásia ho maduru no seguru.

Nia agradese ba apoiu tomak hosi povu hotu liu-liu ba feto maluk sira hosi aldeia to’o nasionál ne’ebé fó ona apoiu atu kandidata an ba Prezidente Repúblika ba nasaun ida-ne’e.

“Se povu fó fiar mai ha’u atu sai hanesan imi-nia Prezidente ne’ebé nakonu ho esperansa atu tau matan ba nasaun ho di’ak mak sei hakruuk hodi servi tuir de’it konstituisaun haruka,” nia hateten.

Nia agradese mós organizasaun hotu no estrutura ho militante tomak ne’ebé fó ona apoiu morál polítiku atu bele kandidata an no ba lulik tomak hodi fó matak malirin.

Nia kompromisu katak bainhira eleitu ba Prezidente Repúblika sei rezigna an hosi kargu Prezidente Partidu Khunto hodi bele servi de’it ba nasaun no povu tomak.

Iha fatin hanesan Prezidente ekipa susesu, Marito Magno, hateten kongressu nasionál partidu KHUNTO ninian no konferénsia nasionál ne’ebé realiza iha fulan tolu liu-ba hodi fó kbiit ba kandidatu PR hodi kompete iha eleisaun prezidensiál.

Komisaun hala’o nia kna’ar importante ne’ebé daudaun hala’o ona nia kna’ar ba preparasaun sira hotu ligadu dokumentu hetan ona autentifikasaun hanesan kartaun eleitorál hosi munisípiu 12 inklui RAEOA.

“Dadus apoiante rejista ona rihun 10 ne’ebé preparadu. Iha tempu badak ami sei ba rejistu iha Tribunál Rekursu,” nia informa.

Notísia Relevante: KHUNTO prontu kumpre desizaun PR dekreta kalendáriu eleisaun

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here