Prezidente Patidu KHUNTO, Armanda Beta dos Santos. Imajen Tatoli/egas Cristóvão.

DILI, 07 janeiru 2022 (TATOLI)—Prezidente Partidu Kmanek Haburas Unidade Nasionál Timoroan (KHUNTO), Armanda Berta dos Santos, deklara fó apoiu no prontu kumpre ba desizaun Prezidente Repúblika nian ba eleisaun prezidensiál iha tinan ne’e.

Prezidente Patidu KHUNTO, Armanda Beta dos Santos, ho nia estrutura hala’o enkontru ho Prezidente Repúblika hodi rona opiniaun molok Prezidente Repúblika dekreta kalendáriu eleisaun prezidensiál, iha Palásiu Prezidente Nicolau Lobato, Bairru Pite, Dili, tersa, (07/01). Imajen Tatoli/Egas Cristovão

“Ohin enkontru ho Prezidente Repúblika hodi kumpre ba konvite ne’ebé mak iha liu-liu ba data ne’ebé Prezidente sei fó sai iha tempu badak. No hosi pontu devista partidu KHUNTO nian importante kona-ba desizaun saida de’it mak Prezidente Repúblika foti partidu KHUNTO fó apoiu ba desizaun ne’ebé Prezidente foti liu-liu kona-ba data,” Prezidente KHUNTO ne’e hateten ba jornalista sira hafoin sorumutu ho Xefe Estadu iha Palásiu Prezidensiál Nicolau Lobato, Bairru Pite, sesta ne’e.

Nune’e, KHUNTO hein desizaun Xefe Estadu nian no preparadu atu partisipa iha eleisaun prezidensiál.

Durante sorumutu, Prezidente Repúblika, Francisco Guterres Lú-Olo apresia partidu KHUNTO durante ne’e.

Hatán kona-ba kandidatura atu kompete, nia dehan, sei hein PR dekreta ona kalendáriu mak sei ko’alia no agora seidauk tempu atu ko’alia.

04 marsu 2021: Armanda Berta ofisialmente deklara kandidata an ba PR

Maibé antes ne’e, domingu (04 jullu 2021) tinan kotuk, Prezidente Partidu Kmanek Haburas Unidade Nasionál Timor Oan (KHUNTO), Armanda Berta dos Santos, ofisialmente deklara nia kandidatura ba Prezidente Repúblika hodi kompete iha eleisaun prezidensiál 2022.

Partidu KHUNTO nu’udar forsa polítika ida iha Repúblika Demokrátika Timor-Leste no hetan mós asentu parlamentár ho kadeira lima (5) iha Parlamentu Nasionál.

Prezidente Partidu KHUNTO, Armanda Berta dos Santos, fiar katak rekursu ne’ebé eziste iha partidu laran ne’e mesak iha esperiénsia, ne’ebé bele duni reprezenta partidu KHUNTO hodi hamutuk ho povu Timor-Leste partisipa iha eleisaun prezidensiál iha tinan oin mai, maibé povu mak sei tetu no deside tuir vontade populár povu nian.

“Ha’u hakarak afirma iha-ne’e katak komprimenta ba desizaun kongresu nasionál no desizaun konsellu lideransa nasionál mak momentu importante ida-ne’e, ha’u hakarak deklara ofisialmente ba públiku katak ha’u (Armanda Berta dos Santos) simu desizaun partidu nian sai kandidatura ba Prezidente Repúblika iha eleisaun prezidensiál ba períodu 2022-2027,” Prezidente Partidu KHUNTO deklara ofisialmente iha ámbitu selebrasaun aniversáriu Partidu KHUNTO ba dala-X no inaugrua  sede partidu KHUNTO, iha Manleuana.

Razaun Partidu KHUNTO deside Armanda Berta dos Santos kompete iha eleisaun prezidensiál ne’e, tanba estuda ona estratéjia polítika hodi orienta nia vizaun no misaun, nune’e sukat KHUNTO nia kbiit rasik hodi prepara mós nia rekursu rasik iha polítika.

Vise-Primeira Ministra ne’e fó-sai katak, Prezidente Repúblika tenke kumpre nia mandatu konstitusionál ne’ebé previstu iha Konstituisaun RDT, nune’e mós garante unidade no integridade nasionál no asume responsabilidade Estadu nian.

Kandidata hosi Partidu KHUNTO ne’e fiar katak, rezultadu eleisaun prezidensiál períodu 2022-2027 sei hamosu surpreza ba povu Timor-Leste.

“Tanba ha’u-nia kandidatura ba eleisaun prezidensiál ne’e luta ba interese povu tomak nian, hametin demokrasia no hametin unidade nasionál,” nia dehan.

Iha biban hanesan, Konselleiru Másimu Partidu KHUNTO, José Dos Santos Naimori Bucar reforsa, lideransa Partidu KHUNTO deside duni fó fiar ba Prezidente atuál KHUNTO nian atu  kandidata aan ba Prezidente Repúblika hodi kompete iha eleisaun Prezidensiál 2022.

“Ami deside, Prezidente KHUNTO kandidata an la’ós atu manan maun sira iha prosesu demokratizasaun, maibé ami hakarak koko forsa partidu nian,” Konselleiru KHUNTO ne’e afirma.

Maibé, Naimori Bucar fiár katak nu’udar feto no inan ida mak kandidata aan ba Xefe Estadu, sei iha hadomi nia oan sira hotu.

Prezidente Repúblika

Iha Konstituisaun RDTL, iha Títiulu II, kona-ba “Prezidente Repúblika” iha Kapítulu I (Estatutu, Eleisaun no Nomeasaun), iha Artigu 74 (Definisaun) hateten, 1) Prezidente Repúblika mak Xefe-Estadu, símbolu no garantia independénsia nasionál no unidade Estadu nian, no instituisaun demokrátika sira-nia funsionamentu regular, no alinea 2) haktuir Prezidente Repúblika mak Komandante A’as liu Forsa Armada nian.

Iha Artigu 75 (Elejibilidade) esplika, 1.) Bele tuir kandidatura ba Prezidente Repúblika sidadaun timor-oan sira-ne’ebé, iha ilas hotu tuirmai ne’e: a) Sidadaun nanis; b) Iha tinan mínimu 35; c) Ho kapasidade di’ak; d) Ne’ebé hetan proposta hosi sidadaun hili-na’in mínimu nain rihun lima (5.000).

Iha alinea 2) esplika, Prezidente Repúblika kaer mandatu to’o tinan lima nia laran no ninia knaar ramata bainhira Prezidente foun simu pose, no alinea 3) hateten Prezidente Repúblika nia mandatu bele hetan renovasaun dala-ida de’it.

Iha Artigu 76 kona-ba “Eleisaun” ne’e iha alinea 1) hateten, Atu sai Prezidente Repúblika, sei hili tuir sufrájiu universál, livre, diretu, sekretu no ida-idak, alinea 2) haktuir Eleisaun Prezidente Repúblika nian banati tuir sistema manán ho votu barakliu hosi votu hotu-hotu ne’ebé válidu, la sura votu ne’ebé la válidu.

Iha alinea 3) esplika, Bainhira kandidatu sira hetan votu hanesan, sei hala’o fali eleisaun dala ida tan, liutiha loron tolunulu (3) hosi loron votasaun ida foin liubá kotuk, no iha alinea 4) hateten Iha eleisaun daruak, kandidatu na’in-rua (2) ne’ebé hetan liu votu no la hasai sira-nia kandidatura mak bele tuir.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here