Diretór Jerál Sekretariadu Tékniku Administrasaun Estatál (STAE), Acilino Manuel Branco. Imajen TATOLI/Egas Cristóvão.

DILI, 19 janeiru 2022 (TATOLI)— Diretór Jerál Sekretariádu Tékniku Administrasaun Eleitorál (STAE), Acilino Manuel Branco, hateten sei koordena ho Ministériu Negosiu Estranjeiru no Kooperasaun (MNEK), atu estabelese ka instala sentru votasaun sia iha diáspora.

“Ha’u rasik sei halo karta ida ba iha parte MNEK atu koordena malu liuliu husu informasaun, nune’e sira sira bele relata mai STAE naran sentru votasaun sira iha rai li’ur. Nune’e mós atu husu ita nia Embaixadór no Konsuladu sira atu hahú identifika ofisiál eleitorál sira sira ne’ebé mak sei ezerse funsaun iha sentru votasaun sira iha rai li’ur ninian,” Diretór Ezekutivu STAE ne’e hateten ba Agência TATOLI, kuarta ne’e.

Notísia relevante: STAE sei atende eleitór ne’ebé kartaun eleitorál lakon no tohar

Tuir planu estabelese sentru votasaun sia, kompostu tolu iha Austrália, mak Darwin, Sidney no Melbourne, ida iha Korea Súl, sentru votasaun rua iha Portugal mak   Lisboa no ida iha Porto, Reino-Unido no Irlandia Norte iha sentru votasaun tolu.

Resensiamentu eleitorál iha diáspora, nia dehan STAE hala’o ona Portugál, Irlandia Norte, Reino Unidu, Koreia Súl, maibé Austrália mak la konsege halo resensiamentu tanba sei aplika lockdown.

“Ami kordena ho parte MNEK atu ko’alia kona-ba prosesu eleisaun iha rai liur tanba importante tebes atu bele ajusta planu hotu atubele fasilita di’ak liután prosesu votasaun iha diáspora, kona-ba Austrália ita la konsege halo resensiamentu, maibé to’o eleisaun bele uza baze dadus eleitór nia iha tinan lima ba kotuk halo eleisaun ” nia akresenta.

Tuir Diretór Acilino katak pelumenus semana ida molok loron eleisaun, sasán ka ekipamentu sira ne’e transporta rai liur inklui mós munisípiu sira, tanba depende mós situsaun pandémia globál.

“STAE nia preperasaun téknika hotu prepradu ona, maibé hela fotográfia kandidatura de’it, kona-ba urna votu no kestaun lojístiku seluk preparadu hotu ona,” nia garante.

STAE mós sei fasilita  treinamentu  ba  Embaixadór sira no funsionáriu Embaixada ne’eb’e iha atu sai brigada no fiskál sira iha sentru votasaun sira iha  liur .

Tuir Dadus provizóriu resensiamentu eleitorál no atualizasaun baze de dadus to’o novembru 2021 eleitór hamutuk 857.487 ne’ebé kompostu hosi Munisípiu Aileu 33.727, Ainaro 44.571, Baucau 95.142, Bobonaro iha 69,822, Covalima 47.935, Dili 190.750, Ermera 82.931, Lautém 48.297, Liquiça 50.965, Manatuto 35.422, Manufahi 40.308, Rejiaun Administrativa Espesiál Oé- Cusse Ambeno (RAEOA) 51.005 no munisípiu Viqueque hamutuk 59.612. 

Enkuantu, dadus resensiamentu eleitorál ba eleitór sira iha Austrália hamutuk 1.489, Korea Súl 1.262, Irlandia 1.251, Portugál 762 no Reinu Unidu hamutuk 2.236.

Notísia relevante: STAE simu ona pedidu hosi Uniaun Europea atu sai observadór

Jornalista : Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here