Diretór Jerál STAE, Acilino Manuel Branco. Imajen TATOLI/Egas Cristóvão

DILI, 17 janeiru 2022 (TATOLI)—Diretór Jerál Sekretariadu Tékniku Adminietrasaun Eleitorál (STAE), Acilino Manuel Branco, hateten resensiamentu eleitorál konklui iha 14 janeiru nune’e STAE sei la fó atedementu tan ba eleitór foun sira-ne’ebé seidauk rejistu maibé sei atende ba ema sira-ne’ebé kartaun eleitorál lakon no tohar.

Notísia Relevante: Resensiamentu eleitorál sei konklui iha 14 janeiru

“Ita lahalo atendementu ba eleitór foun sira. Ita só atende ba ema ne’ebé nia kartaun eleitorál lakon no tohar to’o loron 15 marsu, molok tama ba loron eleisaun 19 marsu. Maske ita-nia komunidade barak mak preokupa tanba alterasaun lei resensiamentu eleitorál ne’e,” Diretór Jerál STAE ne’e hateten ba Agência TATOLI iha nia knaar fatin Vera Cruz, Dili, segunda ne’e.

Bainhira sei loke tan resensiamentu eleitorál mak nia implikasaun makaas iha nia unidade jeografika tanba iha tempu badak sei públika sai iha Jornál Repúblika kona-ba númeru fiksu kada unidade jeografika, tanba ne’e sei laiha tan atendementu ba eleitór iha rai-li’ur no rai-laran.

“Ita-nia resensiamentu eleitorál no atualizasaun baze dadus finaliza ona iha loron 14 janeiru liubá maibé iha ema balun ne’ebé hakarak rejistu no atualiza. Hakarak ka lakohi ami tenke taka no ekipamentu ne’ebé ami hodi rekolla ne’e, sei halo akollamentu mai iha STAE nasionál. Tanba iha kalendáriu ne’e define loos ona prazu ida halo sinkronizasaun ba iha observadór sentrál Dili,” nia esplika.

Alterasaun lei resensiamentu eleitorál ne’e foin eziste iha fulan hirak liubá, maibé antes ne’e STAE reforsa atendementu iha postu adminiatrativu sira nomós iha suku ho aldeia sira balun, foin konsentra loos iha loron 01 jullu 2021 to’o 14 janeiru 2022, signifika atedementu ne’e la’ós prosesu ne’ebé foin hahú entaun bele dehan tempu ne’ebé naruk.

Atedimentu ba kartaun eleitorál ne’e lori tempu ne’ebé naruk tuir lei númeru 6/2016, katak aktus ne’e kontinua katak la’o iha ekritóriu STAE nian hotu iha munisípiu 12 inklui Rejiaun Administrativa Espesiál Oé-Cusse Ambeno (RAEOA).

Dadus provizóriu resensiamentu eleitorál no atualizasaun baze de dadus to’o novembru 2021 eleitór hamutuk 857.487 ne’ebé kompostu hosi Munisípiu Aileu 33.727, Ainaro 44.571, Baucau 95.142, Bobonaro iha 69,822, Covalima 47.935, Dili 190.750, Ermera 82.931, Lautém 48.297, Liquiça 50.965, Manatuto 35.422, Manufahi 40.308, Rejiaun Administrativa Espesiál Oé-Cusse Ambeno (RAEOA) 51.005 no munisípiu Viqueque hamutuk 59.612. 

Dadus resensiamentu eleitorál ba eleitór sira iha Australia hamutuk 1.489, Korea do Súl 1.262, Irlandia 1.251, Portugál 762 no Reinu Unidu hamutuk 2.236.

Notísia Relevante: Resensiamentu eleitorál: STAE rejista eleitór foun 20.076

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here