Diretór Jerál Sekretariadu Tékniku Administrasaun Eleitoral (STAE), Acilino Manuel Branco. Imajen TATOLI/Egas Cristóvão.

DILI, 18 janeiru 2022 (TATOLI)—Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten Uniaun Europeia liuhosi Embaixadór Uniaun Eurepeia iha Timor-Leste entrega pedidu rekerimentu ba STAE atu sai observadór iha eleisaun prezidensiál 2022.

Notísia Relevante: Eleisaun ba Prezidente Repúblika sei akontese iha 19 marsu 2022

“Kona-ba observadór internasionál nian, ha’u simu tiha ona pedidu rekerimentu hosi Uniaun Europeia liuhosi embaixadór Uniaun Eurepia iha Timor-Leste, atu sai observadór ba eleisaun prezidensiál ne’ebé akontese iha 19 marsu ne’e. Nune’e mós, ohin STAE simu ona pedidu rekerimentu hosi organizasaun Fundasaun Mahein, ne’ebé mak aprezenta lista no lori hakarak sai observadór ba eleisaun Perzidente Repúblika nian,” Diretór Jerál STAE ne’e hateten ba Agência Tatoli, iha nia knar fatin Caicoli, Dili, segunda ne’e.

Nia hateten, tuir informasaun katak vizita delegasaun Uniuan Eeuropeia (UE) nian iha tinan kotuk lori rezultadu ne’ebé pozitivu, nune’e sira sei to’o iha Timor-Leste inísiu fulan-fevereiru, delegasaun boot ida hosi Bruseles ne’ebé kompostu hosi ema 30-resin ne’ebé sai membru observadór sei to’o no halo akompañamentu liuhosi monitorizasaun prosesu dezde inísiu fevereiru to’o simu nia rezultadu.

Ho ida-ne’e, nia husu ba organizasaun sira-ne’ebé eziste iha Timor-Leste bele prepara sira-nia dokumentu pedidu rekerimentu ba akreditasaun to’o iha loron 10 marsu antes eleisaun, importante mak sira-nia estatuta teke sita katak sira halo atividade monitorizasaun no mós observasaun.

Laós de’it ba observadór no monitorizasaun sira maibé husu mós ba mídia nasionál no internasionál  sira atu hatama pedidu rekerimentu ba iha STAE, nuene’e depois bele hetan akreditasaun atu bele halo kobertura ba prosesu eleisaun ne’e.

Tuir regulamentu ne’ebé mak iha, liu-liu ba meu komunikasaun sosiál sira, importante mak pedidu sira-ne’e hatama hosi Conselho de Imprensa (CI) to’o iha STAE mak hetan akreditasaun.  

Kona-ba observadór ne’ebé mak atu mai observa eleisaun ida-ne’e, nia dehan, tuir regulamentu ne’ebé mak aprova ona tuir dekretu Governu nian altera ona no fó tan espasu sufisiente, nune’e depois ba organizasaun nasionál tantu internasionál sira-ne’ebé mak iha interrese atu halo monitorizasaun no observasaun ba prosesu bele hahú ona aprezenta sira-nia pedidu apartir entre ein vigór dekretu prezidente repúblika kona-ba markasaun data eleisaun.

Posibilidade eleisaun prezidensiál sei la realiza iha Aústralia

Diretór Jerál hatete posibilidade eleisaun prezidensiál sei la realiza iha Aústralia, tanba pendemia COVID-19 ne’ebé impede ekipa tékniku integradu labele dezloka ba Austrália hodi halo resensiamentu eleitorál no halo preparasaun ba eleisaun preziensiál 2022 ne’ebé akontese iha loron 19 marsu 2022.

Notísia Relevante: Ekipa téknika resensiamentu eleitorál sei voo ba diaspora

“Tékniku integradu preparadu hela desde inísiu bainhira rezolusaun Governu sai no halo koordenasaun nafatin infelizmente ita labele halo dezlokasaun ba iha ne’ebá, tanba ita hotu hatene katak laiha posibilidade mobiliza ekipamentu sira liu-liu halo dezlokasaun to’o país refere. Tanba, to’o agora país refere sei aplika lock dwon entaun la admite ema estrajeiru tama iha país refere,” nia dehan.

Nia dehan, STAE nia baze de dados kontinua eziste liu-liu ba eleitór sira-ne’ebé mak resensia ona iha tinan 2017 no 2018 bainhira sira tuir ona eleisaun.

Bainhira periódu besik eleisaun mak situasaun admite posibilidade tama iha Austrália, mak timor-Leste sei organiza no sidadaun sira-ne’ebá bele tuir eleisaun maibé besik eleisaun mak kontinua aplika ho regra hanesan mak Timor-Leste labele realiza eleisaun iha ne’ebá.

Iha tempu badak, nia dehan, STAE sei komunika ho parte Ministériu Negósiu Estrajeiru no Kooperasaun (MNEK) liuhosi dirasaun ne’ebé toma konta ba asuntu embaixada no konsoladu sira atu hato’o ba STAE naran sentru votasaun ne’ebé rejistu país refere para depois ajusta iha planu operasionál tanba tuir lei iha loron 30 antes no la’ós fó sai númeru eleitór sira maibé fó sai mós naran votasaun sira.

“Ita haree posibilidade, ita organiza no materiál lori ba no eleisaun iha Austrália no sasán sira lori fila mai,” nia dehan.

Tanba, tuir nia, hafoin termina apuramentu loron tolu iha munisípiu no mós Oé-cusse, sepois iha oras 72 nia laran sei kontinua kedas halo apuramentu nasionál iha CNE no oras 72 tan sei hein rezultadu hosi sidadaun diáspora.

“Preparasaun planu operasionál kontinua konsidera sentru votasaun anteriór iha Aústralia no realizasaun eleisaun iha ne’ebá, maibé depende ba situasaun ne’ebé mak akontese iha ne’ebá. Karik, ita laiha posibilidade entaun ita sei la realiza eleisaun iha ne’ebá,” Acilino hateten.

Notísia Relevante: Kaleidoskópiu 2021: tinan polítika no preparasaun eleisaun prezidensiál 2022

Jorrnalista : Osória Marques

Editór         : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here