DILI, 19 janeiru 2022 (TATOLI)- Governu liuhosi Sekretáriu Estadu Juventude no Desportu (SEJD) Abrão Saldanha, hateten sente orgullu tanba atleta Yohan Gonçalves hahú prepara-an atu reprezenta Timor-Leste ba partisipa iha jogu Winter Olympic Games, ne’ebé sei hala’o iha loron 04 to’o 20 fevereiru tinan ne’e, iha nasaun Xina.
“Ita orgullu tebes tanba ita bele ba partisipa iha jogu Winter Olympic Games, maske ita iha atleta na’in-ida de’it hosi modalidade Sky nia mak Yohan Gonçalves, maibé nia ba reprezenta Timor – Leste orgullu ida mai ita,” Sekretáriu Estadu ne’e hateten liuhosi konferénsia imprensa ne’ebé hala’o iha edifísiu SEJD-Lecidere, kuarta ne’e.
Notísia relevante: Atleta Yohan partisipa eventu sky internasionál iha Dubai
Atleta ne’e iha tinan kotuk nia ba tuir pra-kualifikasaun iha Dubai-Uni Emirat Árabe no rai-seluk tan, ne’ebé konsege pasa ona ho pontu haat, nune’e atleta ne’e iha direitu absoluta partisipa iha jogu olímpiku mundiál ne’e.
“Hosi atleta nia partisipasaun fó pontu importante ida mai Timor-Leste mak oinsá bele halo nasaun hotu iha mundu bele koñese ita nia rai, maski hanesan nasaun ka illa kiik ida iha Sudeste Aziátiku,” SEJD orgullu
Nune’e, SEJD aloka fundu ho montante $20,405 ba atleta Yohan Gonçalves hodi halo preparasaun viajen hosi Fransa ba Xina, iha loron 02 fevereiru, hodi partisipa eventu internasionál ne’e.
Iha biban hanesan, Embaixadór Xina iha Timor-Leste, Xiao Jianguo, kompromete pronto apoia Timor-Leste bainhira partisipa iha eventu ne’e.
“Xina nafatin apoiu Timor-Leste bainhira ba partisipa iha eventu ne’e, ami sei ajuda akomodasaun hanesan han-hemu, hela fatin no seluk tan ne’ebé atleta ne’e presiza,” nia akresenta.
Tuir oráriu Atleta Timoroan sei kompete iha jogu sky no freestyle hahú iha loron 16 no 19 fevereiru.
Notísia relevante: TL sei partisipa eventu Winter Olympic 2022 iha Xina
Jornalista : Hortencio Sanchez
Editór : Florencio Miranda Ximenes
