Estadiu Winter Olympics 2022. imajen/geogle

DILI, 05 janeiru 2022 (TATOLI) –  Sekretáriu Estadu Juventude no Desportu (SEJD), Abrão Saldanha, kuarta ne’e,  simu konvite hosi Embaixadór Xina iha Timor-Leste,  Xiao Jianguo, hodi husu disponibilidade Timor-Leste partisipa iha jogu Winter Olympic 2022 ne’ebé sei  realiza iha Beijing-Xina.

“Ohin, ha’u hasoru malu ho Embaixadór Xina, ne’ebé hato’o hela konvite mai ita atubele partisipa iha jogu Winter Olympic 2022 ne’ebé sei hala’o iha Xina. Ha’u informa ona ba nia ita iha ona atleta ida atu ba partisipa,” SEJD Abrão, hateten ba Agência TATOLI iha knaar fatin, Lecidere-Dili.

Atleta Timór-oan Yohan Gonsalves hosi modalidade sky mak sei partisipa eventu XXIV Olympic Winter Games iha Beijing.

Sekretáriu Estadu Juventude no Desportu, Abrão Saldanha. Imajen Tatoli/Francisco Sony

“Ita nia atleta ne’e agora prepara hela iha França tanba iha apuramentu nia (Yohan Gonsalves) mak liu atu reprezenta Timor – Leste hodi partisipa iha eventu internasional ne’e,” SEJD afirma.

Governu Timor -Leste liu hosi SEJD sei apoia másimu orsamentu ba Komité Olímpiku Nasionál Timor-Leste atu finansia atleta Timór-oan ne’e hodi reprezenta Timor -Leste iha eventu ne’e.

Iha biban hanesan, Embaixádor Xina, Xiao Jianguo, hateten, Xina prontu apoia Timor-Leste iha eventu ne’e bainhira nesesidade ruma ne’ebé presiza.

Embaixadór Repúblika Populár Xina, Xiao Jianguo. Imajen TATOLI/Francisco Sony

“Ha’u koalia ho Sekretáriu Estadu atu haree oinsá Timor -Leste nia partisipasaun iha Olympic Winter Games ne’ebé sei realiza iha fevreiru agora. Ami kontente tanba Timor-Leste prepara ona nia atleta ida hodi partisipa. Iha nesesidade balun ami pronto ajuda,” Embaixadór Xina ne’e kompromete.

Eventu internasionál ne’e sei hahú iha loron 04 to’o 20 fevreiru 2022 iha Bejin Xina. Enkuantu nasaun hotu iha mundu sei partisipa tanba kada tinan lima mak realiza enventu ne’e no hala’o iha nasaun ne’ebé la hanesan.

Atleta Yohan Gonsalves partisipa ona iha eventu internasionál Sky iha Dubai ne’ebé fasilita hosi Federasaun Sky Timor-Leste (FSTL) no konsege hatudu rezultadu di’ak no hetan pontu haat, ne’ebé fó biban kedan ba atleta ne’e iha direitu absoluta hodi partisipa iha jogu kategoria internasional ne’e.

Notísia relevante:  Atleta Yohan partisipa eventu sky internasionál iha Dubai

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here