Prezidente Komisaun Nasionál Eleisaun (CNE-sigla portugés), José Agostinho Belo. Imajen/Espesiál.

DILI, 01 setembru 2021 (TATOLI)—Prezidente Komisaun Nasionál Eleisaun (CNE-sigla portugés), José Agostinho Belo, hateten ekipa téknika ba resenseamentu eleitorál tenta ona atu voo ba diaspora iha semana daruak fulan-setembru nian. 

Notísia Relevante: COVID-19: Ekipa téknika sei adia aranka ba diaspora

“Voo ne’ebé ita tenta ne’e iha semana daruak fulan-setembru nian. Hosi CNE, ami delega ami-nia Komisáriu na’in-rua (2) no funsionáriu na’in-neen (6), hamutuk na’in-ualu (8) mak dezloka ba Portugál, Austrália, Corea no Irlandia,” José Agostinho Belo hateten ba Agência TATOLI, iha nia knaar fatin, Colmera, Dili, kuarta ne’e.

Ekipa téknika resensiamentu eleitorál ne’e, sei fasilita eleitór sira iha diaspora atu oinsá atualiza fali sira-nia dokumentu, tanba uluk hela Timor-Leste maibé agora iha rai-li’ur entaun presiza iha resensiamentu eleitorál, nune’e hatene tuir sidadaun TL hira mak iha rai-li’ur. 

Ho pandemia no variante foun Delta COVID-19 ne’e, voo ne’ebé viajen ba-mai ne’e laiha, tanba ne’e CNE tenta ona atu buka voo iha setembru semana daruak nian, nune’e sira bele dezloka no prosesu resensiamentu eleitorál mós la’o daudauk ona.

Durasaun ba resensiamentu eleitorá iha diaspora, Prezidente CNE ne’e hateten, ninia efetividade ne’e semana rua ka tolu tanba haree ba situasaun globalmente ne’ebé mundu tomak enfrenta.

“Durasaun resenseamentu eleitorál iha diaspora labele kleur tanba situasaun pandemia COVID-19. Ne’ebé, efetividade no másimu ne’e kala ita iha fulan rua tanba ita sei sura ho voo ba-mai nian. Situasaun agora la hanesan uluk, nune’e ita mós sei haree ba asuntu hirak ne’e,” nia dehan.

Antes ne’e Diretór Jerál Sekretáriu Tékniku Administrasaun Eleitorál (STAE), Acilino Manuel Branco, hateten ekipa téknika kontinua diskute kona-bá orsamantu ba resensiamentu eleitorál iha diaspora.

“Agora daudaun ne’e, téknika sira koordena hela ho ajénsia sira aviaun nian. Bainhira iha ona aviaun ne’ebé mak fiksa ona kona-ba data ba-mai nian, entaun tempu badak ekipa sei dezloka. Maibé ita presiza mós haree COVID-19 nian ne’ebé mak liga ho aviaun tanba ita hatene katak aviaun ne’e laiha aviaun regularidade ida,” nia dehan.

Tanba, tuir informasaun ne’ebé STAE simu hosi Australia katak iha semana rua kotuk aplika hela serka sanitária no konfinamentu obrigatóriu, iha Corea aplika lokwdown totál, no Portugál no Inglatera mak aplika kuarentena, maibé dezafiu ne’ebé Timor-Leste enfenta mak aviaun tama no sai ne’e.

Proposta orsamentu ba resenseamentu eleitorál iha diáspora ne’e, ekipa téknika sira halo diskusaun atu aloka ba nesesidade oioin hanesan osan ba bagajen aviaun nian tanba hodi transporta ekipamentu resensiamentu eleitorál, osan ba formasaun resensiamentu eleitorál, kustu billete aviaun nian no kustu ba kuarentena iha estranjeiru.

Notísia Relevante: MNEK propoin atendimentu movel ba resenseamentu eleitorál iha diaspora

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here