Ministériu Finansa liuhosi Dirasaun Jerál Patrimóniu Estadu, realiza sesaun traballu kona-ba diseminasaun regra no prosedimentu utilizasaun veíkulu Estadu ba liña ministériu sira, iha auditórium Ministériu Finansas, Aitarak-laran, tersa (18/01). Imajen TATOLI/Francisco Sony

DILI, 18 janeiru 2022 (TATOLI)–Ministériu Finansa (MF) liuhosi Diresaun Jerál Jestaun Patrimóniu Estadu rejista veíkulu Estadu hamutuk unidade 3.415, ne’ebé unidade 2.820 (83%) destaka iha nasionál no unidade 595 (17%) destaka iha munisípiu.

“Iha veíkulu Estadu a’at hamutuk unidade 402 no di’ak unidade 3.013, ne’ebé hosi totál ne’e, karreta Estadu tama tinan leilaun hamutuk unidade 2.522 no karreta Estadu di’ak tama iha leilaun unidade 893,” Diretór Jerál Jestaun no Patrimóniu Estadu MF, Januário da Gama, informa bainhira halo aprezentasaun kona-ba diseminasaun regra no prosedimentu jestaun no realokasaun veíkulu Estadu, iha Auditorium Ministériu Finansa, Aitarak-laran, tersa ne’e.

Notísia relevante: Hahú ohin, veíkulu Estadu “para” iha eskritóriu

Totál ne’e inklui karreta ambulánsia no karreta funeráriu unidade 42, inklui karreta pezadu hamutuk unidade 28, nune’e totál finál ba karreta Estadu inklui pezadu hamutuk unidade 3.696.

“Karreta unidade 2.522 ne’e maka tama ona iha grupu leilaun, maibé ita kontinua uza no la halo redusaun, signifika ida-ne’e mak sei kontribui ba despeza boot kada tinan kuandu la halo redusaun hodi submete ba leilaun,” Diretór akresenta.

Enkuantu, hafoin atualiza dadus to’o 2021 inklui veíkulu ne’ebé sosa to’o iha fulan-dezembru, viatura ne’ebé sosa no hetan doasaun inklui konfirmasaun iha tinan 2021 iha aumentu unidade 276.

Hosi totál karreta hamutuk unidade 3.692, númeru fiksa unidade 2.492, no karreta Estadu seidauk tama tinan leilaun hamutuk unidade 1.169 no karreta ne’ebé prienxe ona leilaun maibé sei kontinua uza hamutuk unidade 1.323.

Nune’e, iha tinan 2019-2021 totál redusaun leilaun unidade 1.196, karreta sosa foun no doasaun iha tinan 2021 hamutuk 276 ho totál hamutuk unidade 266, ne’ebé la inklui ekipamentu pezadu.

“VIII Governu hatúr polítika promove efisiénsia no efetividade utilizasaun veíkulu Estadu maibé introdusaun polítika ida-ne’e Governu aprova mós hodi halo transformasaun poupansa ne’ebé hetan hosi efisiénsia no efetividade utilizasaun veíkulu Estadu, ba fali subsídiu transporte ne’ebé funsionáriu públiku tantu rejime jerál no ajente administrativu iha direitu atu hetan subsísidu transporte ne’e sura hosi janeiru 2021 ba oin,” Diretór esplika.

Notísia relevante: Governu kria subsídiu mensál transporte ba funsionáriu administrasaun públika

Hosi desizaun polítiku ne’ebé mak iha, ninia prinsipiu esensiál maka hakarak halo poupansa ba kustu manutensaun, reparasaun no kombustível.

Antes ne’e, ekipa halo survey iha faze rua, dahuluk iha tinan 2019 no konfirmasaun dadus iha tinan 2020 no 2021 hodi hamosu afetasaun númeru fisku.

“Kobertura hosi fleet survey ba instituisaun Estadu, serbisu fundu autonomia no administrasaun munisipál, postu administrativu, inklui Rejiaun Administrativa Espesiál Oé-cusse Ambeno (RAEOA). Fleet survey ne’ebé mak halo iha tinan 2019 no halo atualizasaun dadus iha tinan 2020,” nia dehan.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here