Karreta Estadu destaka iha servisu fatin durante Natál, 24-27 dezembru 2020 no tinan foun, 01-03 janeiru 2021. Imajen Tatoli/Joanico de Araújo

DILI, 14 janeiru 2022 (TATOLI)—Governu liuhosi Ministériu Finansa, sesta ne’e, hasai ona sirkular ho númeru 01/VIII/GM-MF/2022-01, atu kargu xefia sira iha instituisaun públiku tenke estasiona ka para ona véikulu Estadu iha eskritóriu ka serbisu fatin.

Diretór Jerál Finansa Estadu Ministériu Finansa (MF), Januario da Gama, bainhira ko’alia iha panorama orsamentál 2019 iha MF Aitarak Laran. Imajen Egas Cristovão

“Estasionamentu veíkulu Estadu hahú efetua hosi loron 14 janeiru 2022, nune’e husu ba LM/IE no SFA sira tenke kumpre sirkular ida ne’e ho rigórozu. Ekipa Task Force ba Kontrolu Movimentu Veíkulu Estadu sei ativamente halo kontrolu kona-ba utilizasaun veíkulu Estadu durante estasionamentu veíkulu sira no utilizasaun veíkulu ba oin”, Diretór Jerál Patrimóniu Estadu, Ministériu Finansa, Januário da Gama, ba jornalista-sira liuhosi konferénsia impresa iha salaun patrimónia Estadu-Balide, tersa ne’e.

Sirkular hosi MF ne’e tuir númeru 1 artigu 1 kona-ba Regulamentu Atribuisaun no Uzu Veíkulu Estadu, anexu hosi Dekretu-Lei númeru 8/2003, 18 Juñu, veíkulu Estadu bele afeita ba kada Ministériu ho despaxu fundamentadu husi Ministériu Planu no Finansas ho referénsia tuir verba ne’ebé inskrita iha Lei Orsamentu Estadu nian.

Nune’e mós, tuir númeru 2 hosi Rezolusaun Governu númeru 130/2021, 29 setembru, kona-bá Jestaun no Realokasaun Veíkulu Estadu, membru Governu ne’ebé responsável ba área finansa fixa ho despaxu tuir regra temi iha paragrafu anteriór, númeru limite veikulus Estadu no veikulus afeitadu ba kada orgaun no servisu haree ba ninia nesesidade operasionál sira.

Viatura Estadu. Imajen TATOLI/Egas Cristóvão

Konsidera mós despaxu Ministru Finansa númeru 03/VIII/GM-MF/2022-01, (12 janeiru) kona-bá afeitasaun númeru fiksa ba orgaun no servisu sira.

Nune’e, ba konkretizasaun implementasaun regra, iha primeiru trimestre tinan 2022, Ministériu Finansa emite sirkulár ida ne’e, hodi husu ba kargu xefia hahú hosi Diretór Jerál to’o Xefe Departamentu sira hotu estasiona veíkulu Estadu hotu iha fulan janeiru 2022.

“Estasiona ka para veíkulu hotu iha resintu kada Ministériu, Instituisaun no Servisu Fundu Autónoma sira ba veíkulu Estadu ne’ebé utiliza husi Jestór sira husi Diretór Jerál ou ekivalente to’o veíkulu operasionál nian,” Diretór Jerál ne’e akresenta.

Nia dehan atu fasilita funsionamentu sira sei jere husi Diresaun Lojístika no Patrimóniu kona-ba nesesidade mobilizasaun diária ba fins profesionál hodi hein konfirmasaun númeru fiksa, realokasaun no rekollamentu redusaun ba leilaun ne’ebé sei efetua hosi Ministériu Finansa (MS), Komisaun Anti Korupsaun (CAC,sigla portugés) no Komisaun Funsaun Publika (CFP,sigla portugés).

Diretora Nasionál Monitorizasaun Jestaun Patrimóniu Estadu Januario da Gama, hamutuk CAC CFP halo konferensia imprensa kona-ba viatura estadu.iha balide, sexta (14/01). Imajen TATOLI/Egas Cristóvão

“Veíkulu Estadu sira ne’ebé para iha eskritóriu no autoriza de’it hodi halo movimentu durante oras serbisu no la autoriza hodi jestór sira ou veíkulu operasionál lori ba uma no hosi fatin servisu ba uma. Karik iha nesesidade ba fins profisionál nian tenke fundamenta ho autorizasaun husi superior,” Januario fó hanoin.

Maibé, Diretór ne’e dehan regra hirak ne’e la aplika ba serbisu Saúde, Seguransa, Bombeiru no entidade seluk ne’ebé tuir lei haruka hodi serbisu ho rotativu, maibé tenke komprova ho ordém traballu ne’ebé aprovadu hosi superiór sira.

Tanba ne’e, Ministériu Finansa (MF) sei imediatamente halo sosializasaun ba kargu xefia kona-ba  Rezolusaun Governu númeru 13/2021 kona-ba Jestaun no Realokasaun Veíkulu Estadu, Despaisu MF no Padraun Prosedimentu Operasionál, molok ekipa konjunta hosi MF, CAC no CFP efetua servisu inspesaun, konfirmasaun no rekollamentu veíkulu Estadu.

Notísia Relevante: Governu kria subsídiu mensál transporte ba funsionáriu administrasaun públika

Jornalista : Natalino da Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here