Primeiru Ministru, Taur Matan Ruak, prezide reuniaun extradordinária Konsellu Ministru, iha Palásiu Governu, segunda (20/09). Imajen TATOLI/Francisco Sony

DILI, 20 setembru 2021 (TATOLI)—Governu liuhosi reuniaun Konsellu Ministru (KM) extraordinária, aprova Projetu Dekretu-Lei ne’ebé aprezenta hosi Ministru Finansa, Rui Augusto Gomes, kona-ba kria subsídiu mensál transporte ba servidór Estadu sira.

Tuir Ministru Prezidénsia Konsellu Ministru, Fidelis Manuel Leite Magalhães, subsídiu ne’e ba titulár sira iha kargu diresaun no xefia, inklui ba funsionáriu sira administrasaun públika, atu substitui atribuisaun veíkulu Estadu.

“Kriasaun subsídiu ne’e atu kompensa kustu regulár hosi benefisiáriu sira, relasiona ho transporte no mós atu hamenus despeza hosi atribuisaun veíkulu Estadu no promove rasionalizasaun ba parke automóvel públiku,” Ministru Fidelis relata hafoin ramata reuniaun ezekutivu, iha Palásiu Governu, segunda ne’e.

Notísia relevante: Governu planeia kria subsídiu alimentár no transporte ba funsionáriu públiku

Montante mensál subsídiu nian ho valór $25 ba funsionáriu públiku sira, $50 ba Xefe sesaun, $75 ba xefe departamentu, $100 ba diretór nasionál sira no $150 ba diretór jerál sira.

“Kalkula katak medida ne’e permite atu alkansa poupansa ida liu $700.000, kona-ba kustu atuál akizisaun no manutensaun ba veíkulu no kombustível nian,” Portavóz Governu dehan.

Projetu Dekretu-Lei ne’e sei haruka ba Prezidente Repúblika hodi hetan promulgasaun no hahú implementa iha fulan-janeiru 2022.

Jornalista : Antónia Gusmão

Editora     : Julia Chatarina

1 KOMENTÁRIU

  1. funcionario bai-bain sa’e bemo deit tanba ne’e mak governu fo subsidiu kada funicionario bai-bain U$ 25,00 kada fulan ne’e, director sira governu fo U$100,00 n0 U$150,00 tanba governu hadomi liu sira, governu hakarak sira sa’e deit mak taxi online nian, tanba nemk fo sira kda direktor ho osan bor hanesan ne’e, direktor sira simu ona osan bot maibe governu nafatin kontinua fo sira osan bot, haluhan tiha povu kbit laek, ne’ebe uluk fo votus hodi detrmina indpendensia rai doben ida ne’e, mauhu naok ten sira uluk halo traisaun no lakohi ukun an mak horas ne’e goja fali ukun an ida ne’e no simu osan bot hodi hanehan povu ne’ebe mak uluk luta ba ukun an ida ne’e.
    diak

HAKEREK NO HATÁN

Please enter your comment!
Please enter your name here