Foinsa’e na’in-tolu hala’o hela sira-nia atividade hodi hili sasán uzadu hanesan kalen no besi-aat sira-ne’ebé soe iha lixeira Tibar, sesta (05/02/2021). Imajen TATOLI/António Gonçalves.

DILI, 17 janeiru 2022 (TATOLI)—Ministru Administrasaun Estatál (MAE), Miguel Pereira de Carvalho hatete tinan ne’e, Governu transforma lixu iha lixeira Tibar hodi hahú implementa sistema lixu ateru kontroladu.

Notísia Relevante: PN husu Autoridade Munisípiu Dili halo jestaun ba lixeiru Tibar

“Lixu Tibar ne’e, ami planea iha tinan ne’e duni hosi forma ida hodi transforma ba Sistema lixu ateru kontroladu, nune’e bele hamate tiha ai-su’ar depois mak hakoi tiha lixu sira-ne’e iha rai-kuak, nune’e lalar labele hobur. Sistema foun ne’e ha’u espera iha tinan ne’e fó solusaun ba lixu iha Dili,” Ministru Administrasaun Estatál ne’e hateten ba Agência TATOLI, iha Sentru Konvensaun Dili (CCD-sigla portugés), foin lalais ne’e.

Tanba ne’e, nia dehan, MAE hamutuk ho autoridade munisipál sira halo sensibilizasaun iha suku no aldeia sira kona-ba konteudu hosi dekretu lei 2/2017, nune’e bele garante ba populasuan sira.

Regulmentu kona-ba sistema jestaun lixu urbana ho dekretu lei 2/2017 ne’ebé mak fó biban ba Autoridade Munisípiu Dili (AMD) no administrasaun postu administrativu atu bele halo jestaun ba lixu.

Governu sei estabelese sistema ida ba kompozisaun lixu hosi uma-kain mai tau iha kaixa (kontentór) lixu-nian, hafoin soe iha lixeira Tibar nian depois lixu sira-ne’e uza sistema lixu ateru kontroladu.

Nia informa, komunidade iha kapitál Dili prodús lixu tonelaada 220 kada loron ida no hosi lixu hirak ne’e, 55% mak komapañia sira raut no tula ba lixeira Tibar no 45% ne’e soe tuun ba drainajén ka baleta depois bee-mota lori ba tasi, lixu balun ema sunu no balun hakoi.

“Ho ida-ne’e autoridade munisípiu halo mak tenke mellora jestaun lixu atu transforma sistema kollesaun lixu ida-ne’ebé mak atuál no ida-ne’ebé mak modern. Se ita tau kaixote (kontentór) lixu iha kilometru 170 iha dalan mak transporte hodi ba tula ba lixeira Tibar,” nia hateten.

Solusaun ida mak oinsá atu bele hadi’a jestaun lixu ho di’ak mak rejime jurídiku kona-ba jestaun lixu ne’e estabelese ona mak selu koima, maibé só falta de’it mak rejime jurídiku kontra ordenasaun ne’ebé fó biban ba autoridade munisipál para bele halo prosesu.

“Ita-nia obrigasaun dahuluk mak tenke kumpre regra sira-ne’ebé mak fó sai ona ne’e, katak labele soe lixu arbiru ida dalan públiku,” nia dehan.

Governante ne’e hateten, to’o agora Autoridade Munisipál Dili (AMD) seidauk bele aplika koima ba sidadaun sira-ne’ebé mak soe lixu arbiru iha dalan públiku lahó responsabilidade.

“Ita seiduak bele aplika koima ne’e tanba ita seidauk hadi’a regulamentu kona-ba sistema jestaun lixu ne’e. Bainhira hadi’a ona mak ita foin aplika regra ne’e,” nia dehan.

Notísia Relevante: AMD sei fó koima ba infratór sira-ne’ebé soe lixu arbiru

Dekretu-lei 33/2008 kona-ba Ijiene no Órden Públika seidauk aplika

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here