Joven ida deskansa hela hafoin halo aktividade hili sasán uzadu hanesan kalen no besi-aat sira ne’ebé soe iha lixeiru Tibar, sesta (5 /2/2021). Imajen Tatoli/Antonio Goncalves.

DILI, 13 janeiru 2022 (TATOLI)—Autoridade Munisípiu Dili (AMD) sei aplika Dekretu Lei 33/2008 konaba ijiéne no orden públika hodi fó koima ba infratór sira-ne’ebé soe lixu arbiru iha tinan ida-ne’e.

Notísia Relevante: Presiza Diploma Ministeriál Hodi Implementa Dekretu Lei Ijiene-Órden Públika

Sekretariadu Prezidente Autoridade Munisípiu Dili, António Moniz Clau, hateten iha dekretu-lei refere liu-liu iha artigu 9 kona-ba koima ba ema sira-ne’ebé soe lixu arbiru (infratór) sira-ne’e hosi $5 to’o $500, maibé ema atu selu sansaun ne’e seidauk define ho loloos entaun presiza padraun balun atu haforsa dekretu-lei refere.

“Agora ita iha hela preparasaun, ne’ebé iha 2022 ne’e ita sei aplika dekretu lei 33/2008, maibé ita sei servisu ho institusaun relevante inklui mídia sira hotu oinsá atu haree lei ne’e. Se ita ko’alia de’it maibé nunka mais implementa lei ida-ne’e atu atua situasaun sira-ne’e, Dili nunka mais muda,” António Moniz Clau, informa ba Agência Tatoli, iha nia knaarfatin, Matadoru, Díli, tersa ne’e.

Tanba ne’e, Autoridade Munisípiu Dili nia planu mak sei halo koordenasaun ho instituisaun relevante sira atu oinsá ezekuta dekretu lei ida-ne’e ba komunidade no empreza sira-ne’ebé soe foer arbiru iha Dili laran.

Iha Dekretu Lei 33/2008 ne’e atu implementa ba sidadaun hotuhotu iha Dili laran kuandu soe fo’er arbiru no la tuir regra mak autoridade munisípiu Dili sei fó koima ba infratór sira, liuhosi halo kooperasaun ho instituisaun relevante sira hanesan Polísia Nasionál Timor Leste, Sekretáriu Estadu Meu Ambiente, Ministériu Obra Públika no husu mós orientasaun hosi Ministériu Administrasaun Estatál.

Notísia Relevante: Munisípiu Dili seidauk aplika koima ba ema ne’ebé komete infrasaun

Entretantu konaba loja supermerkadu sira, nia dehan, autoridade munisípiu Dili iha orientasaun rua ne’ebé mak fó ba loja sira liuhosi autoridade komunitáriu sira katak lixu ne’ebé ho kuantidade boot sira ba so’e diretamente iha lixeiru Tibar, maibé ba lixu sira ne’ebé ho volume kiiko’an sira bele so’e iha lixu fatin ne’ebé Governu prepara.

“Ami orienta ona ba xefe suku no administradór postu sira atu tau atensaun másimu ba itania loja sira-ne’ebé mak so’e foer arbiru. Tanba, iha 2021, ita halo detensaun ba membru loja xineza rua ne’ebé so’e lixu ho kuantidade boot no so’e lixu la tuir oras. Tanba, ita hasai ona sirkulár katak oras atu soe fo’er mak dadeersan iha 06h00 ba leten labele so’e foer ona. Enkuantu, ba lokraik ni’an oras atu so’e foer mak 07h00 ba leten labele soe lixu,” nia informa.

Autoridade Munisípiu Dili halo hela akompañamentu iha terrenu, liuhosi informa no fó sirkulár ba loja sira, maibé sira viola nafatin maka autoridade sei atua no fó xamada atensaun inklui fó mós deklarasaun eskrita ba sira.

“Daudaun ne’e, ita halo hela kontrolu liuhosi itania pesoál saneamentu ne’ebé ita monta tuir zona. Ne’ebé, kontrolu ita halo hela, kuandu ita hetan asaun sira-ne’ebé mak sai hosi itania orientasaun, ita bolu sira no fó karta xamada atensaun atu sira bele kumpre saida mak ita hatun ba sira,” nia dehan.

Notísia Relevante: AMD sei koloka kaixote lixu 4000 iha sidade Dili

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here