Logotipu CEFTEC. Imajen/Espesiál

DILI, 14 janeiru 2022 (TATOLI)—Sekretaria Estadu Komunikasaun Sosiál (SEKOMS) liuhosi Sentru Formasaun Téknika iha Komunikasaun (CEFTEC-sigla portugés) iha fulan abríl ne’e, sei realiza simpóziu nasionál hodi ko’alia konaba aspeitu legál, finanseiru no rekursu umanu antes estabelese Institutu Formasaun ba Jornalista.

Notísia Relevante: CLJ entrega relatóriu estudu viabilidade servisu jornalizmu ba SEKOMS

Koordenadór Sentru Formasaun Téknika iha Komunikasaun (CEFTEC-sigla portugues), Rafael da Silva Freitas, hateten preparasaun estabelesimentu institutu formasaun ba jornalista durante ne’e, SEKOMS liuhosi CEFTEC hala’o hahú hosi 2019 hodi realiza semináriu internasionál no 2021 halo mós foku halo diskusaun grupu ho mídia-na’in no akademista sira.

“Iha 2022 ne’e Ministru Asuntu Parlamentár no Komunikasaun Sosiál, Francisco Jeronimo, mós husu atu halo estudu viavibilidade tama tan iha programa, entaun iha tinan ne’e ami foku atu halo simpóziu nasionál ida hodi haree ba aspeitu legál, infraestrutura, kurikulu ba formasaun, rekursu umanu, finanseira, jestaun organizasionál, garantia sustentabilidade no aspetu merkadu, nesesidade komunidade ba formasaun,” Rafael da Silva Freitas hateten ba Agência Tatoli, iha nia knaarfatin, Palásiu Governu, kinta ne’e.

Nune’e, MAPKOMS no SEKOMS fó delegasaun kompetensia ba iha Dirasaun Nasionál Promosaun Dezenvolvimentu Mídia Lokál (DNPDML) no CEFTEC rasik, entaun propoin atu ministru asuntu parlamentár lori ba ba Konsellu Ministru atu debate.

“Ne’ebé, kritériu hotuhotu ne’ebé uluk SEKOMS husu agora hein de’it mak estudu nesesidade formasaun nia validasaun siéntifiku, tanba Sekretáriu Estadu Komunikasaun Sosiál fó nia deadline iha janeiru, maibé ita haree took tanba feriadu mós barak,” nia hateten.

Tanba ne’e, ministru asuntu parlamentár fó orientasaun katak tinan ne’e hatama mós estudu viabilidade no realidade balun la’o ona hosi tinan rua ba kotuk, maibé iha tinan ne’e sira tau tan estudu viabilidade ne’e atu hakle’an tan, liliu ba aspeitu ualu (8) ne’e.

“Ne’ebé, ita hein de’it estudu nesesidade formasaun prelimináriu hosi profesora Consultório da Lingua para Jornalista (CLJ) sira halo kuandu hetan ona validasaun siéntifika hosi matenek-na’in sira hosi Portugál, entaun ita bele mai aprezenta no submete ona ba Sekretáriu Estadu lori ba Ministru atu aprezenta ba Konsellu Ministru,” nia dehan.

Notísia Relevante: CEFTEC iha faze preparasaun transforma ba institutu formasaun

Tanba, nia dehan, programa atu harii Institutu Formasaun ba Jornalista ne’e aprovadu iha Parlamentu Nasionál (PN) ne’ebé sirania komprimidu katak iha tinan lima mandatu VIII Governu Konstitusionál atu harii, ntaun Governu sei esforsu atu harii iha tinan lima nia laran.

“Tanba, estabelesimentu institutu formasaun ba jornalista ne’e sei lori ba Konsellu Minsitru hodi debate no bainhir aprova mak ita bele estabelese sentru refere,” nia dehan.

Entretantu, iha simpóziu nasionál ne’e sei ko’alia kona-ba aspeitu ualu (8) mak hanesan aspeitu legál, infraestrutura, kuríkulu ba formasaun, rekursu umanu, finanseira, jestaun organizasionál, garantia sustentabilidade no aspeitu merkadu, nesesidade komunidade ba formasaun.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here