Formadora Jornalismu, Sandra Ferreira, entrega relatóriu Estudu Viabilidade Nesesidade Servisu Jornalizmu nian iha Timor-Leste ba Koordenadór CEFTEC, Rafael Freitas. Iha salaun SEKOMS, kinta (28/10). Imajen Tatoli/Francisco Sony .

DILI, 28 outubru 2021 (TATOLI)–Institutu Camões liuhosi projetu Consultóriu da Língua Para Jornalista (CLJ), kinta ne’e entrega relatóriu estudu viabilidade nesesidade servisu jornalizmu iha TimorLeste ba Sekretária Estadu Komunikasaun Sosiál (SEKOMS).

“Objetivu hosi entrega relatóriu ne’e, tanba CEFTEC atu sai ba institutu formasaun jornalista TimorLeste, entaun kriteria balun ne’ebé atu prenxe sai institutu ida mak halo peskiza ne’e. Entaun, bainhira halo peskiza ne’e ami halo ona semináriu internasionál no relatóriu estudu viabilidade ida-ne’e atu haforte dokumentu sira hodi lori ba aprezenta iha Konsellu Ministru,”  Koordenadór Sentru Formasaun Téknika iha Komunikasaun (CEFTEC), Rafael Freitas, hateten ba Agência Tatoli, iha Palásiu Governu, Dili, kinta ne’e.

Estabelesimentu institutu formasaun ba jornalista téknikamente CEFTEC preparadu, maibé atu instala instutu ne’e Sekretáriu Estadu Komunikasaun Sosiál, Merício Juvinal dos Reis ‘Akara’ sei aprezenta relatóriu no esbosu ba Ministru Asuntu Parlamentár no Komunikasaun Sosiál (MAPKOMS), Francisco Jerónimo Martins, hodi lori ba iha Konsellu Ministru (KM).

“Téknikamente ami preparadu, maibé atu ba instala institutu ida-ne’e sei iha Sekretáriu Estadu mak sei lori ba Ministru atu aprezenta iha Konsellu Ministru,” nia dehan.

Estabelesimentu institutu formasaun jornalista TimorLeste, durante ne’e CEFTEC preparadu ona hanesan halo semináriu internasionál, foku diskusaun no halo mós relatóriu estudu viabilidade nesesidade servisu jornalizmu iha TimorLeste, tanba ida ne’e kritériu bainhira atu estabelese institu formasaun.

“Aminia preparasaun iha tinan 2019 ami halo ona semináriu internasionál no foku diskusaun grupu iha fulan jullu liubá. Ikus liu sirania relatóriu ne’e hodi ajusta hamutuk ho esbosu institutu atu aprezenta ba Sekretariu Estadu hodi lori hato’o ba ministru hodi aprezenta ba Konsellu Ministru,” nia informa.

Entretantu, tuir dadus hosi Sentru Formasaun Téknika iha Komunikasaun (CEFTEC) kada tinan CEFTEC prodús formandu hamutuk 100resin ne’ebé tuuir formasaun iha área televizaun, rádiu, hakerek imprensa, jestaun krize, tetum, portugés, relasaun públika no protokolu.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here