Diretór CEFTEC, Luís Evaristo Soares. Imajen TATOLI/Egas Cristóvão

DILI, 01 marsu 2021 (TATOLI)—Sentru Formasaun Téknika Komunikasaun (CEFTEC, sigla portugés) daudaun ne’e iha hela faze preparasaun ba transformasaun hosi sentru formasaun ba institutu fomasaun ba jornalista sira.

“Ami halo ona komunikasaun ho  Ajénsia Nasionál Avaliasaun Akreditasaun Akadémika (ANAAA), hosi Ministériu Ensinu Superiór, Siénsia no Kultura (MESSK) no identifika ona tenki iha institutu rasik, ne’ebé agora daudaun halo diskusaun ho asesór jurídiku iha Sekretaria Estadu Komunikasaun Sosiál (SEKOMS) hodi ko’alia kona-ba kestaun ne’e,” Diretór CEFTEC, Luís Evaristo Soares, informa ba Agência TATOLI, iha salaun auditóriu Muzeu Rezisténsia, segunda ne’e.

Tuir Diretór ne’e katak planu tranformasaun ba institutu ne’e mai hosi VIII Governu Konstitusionál.

“Prosesu ne’e hahú tinan 2018 to’o 2023, espera katak sei realiza maibé ita hatene prosesu ne’e naruk no ninia rekezitu mós barak,” nia akresenta.

Tuir responsável ne’e, dezafiu traforma ba institutu formasaun iha kondisaun infraestrutura no rekursu umanu, maski nune’e CEFTEC hahú prepara ona.

“Agora ita iha ona rekusu humanu, ne’ebé hanesan formadór kualifikadu  ba  área espesífiku sira no téknikamente ida-ne’e mak sai hanesan sasukat ba ami atu halo planu estratéjiku ba CEFTEC no ami halo ona konseitu  báziku ba tranformasaun,” nia hatutan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here