Jestór Klínika Bairru-Pité, Inácio dos Santos. Imajen: Felicidade Ximenes

DILI, 01 setembru 2020 (TATOLI)-Ministériu Saúde asina ona nota intendimentu (MoU-sigla portugés) ida ho Klínika Bairru-Pité hodi fó apoiu osan ho valór millaun $ 15 kada fulan hahú setembru to’o dezembru 2020.

Nota kooperasaun ne’e parte rua asina ona iha fulan-jullu liubá maibé ninia implementasaun mak komesa iha setembru.

Notísia Relevante :Klínika Bairru-Pité Kontinua Enfrenta Krize Finanseiru

Jestór Klínika Bairru-Pité Dili, Inácio dos Santos, hateten ho apoiu ne’e maka tulun ona nia parte atu komesa simu fali pasiente sira halo baixa ka internamentu.

”Suporta finanseira ne’e atu servisu ba iha koidadu saúde primária ne’ebé mak akontese iha Klínika Bairru-Pité entaun ho ida ne’e mak iha fulan-setembru sei re-ativa filafali servisu internamentu sira liliu baixa ba inan sira partu no mós internamentu ba kuidadu má nutrisaun nian,” dehan nia ba jornalista iha ninia servisu fatin, segunda (31/08).

Klínika Bairru-Pité iha espasu natoon atu simu pasiente husi ema na’in 20 to’o 30 ne’ebé halo internamentu kada loron.

”Klínika Bairru-Pité no Sentru Saúde Vera Cruz taka ba partus normál iha HNGV entaun ami tenki re-ativa para bele redúz servisu HNGV ne’e rasik,” tenik Inácio.

Ba futuru, Fundu Apoiu Soseidade Sivil iha Gabinete Primeiru-Ministru kompromete atu suporta orsamentu ba klínika refere.

“Ami fiar katak tinan oin mai no futuru sei iha Orsamentu Jerál Estadu sufisiente liután para atu la’o ba oin,” dehan nia.

Klínika Bairru-Pité iha médiku na’in neen, parteira na’in 10, enfermeiru na’in 16, no tékniku laboratóriu na’in haat, no farmasista na’in tolu.

Notísia Relevante :Klínika Bairru Pité Sei Realiza Angriasaun Fundu

Jornalista : Feliciadde Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here