Prezidente Repúblika, Francisco Guterres Lú Olo. Imajen TATOLI/António Gonçalves.

DILI, 03 janeiru 2022 (TATOLI)—Prezidente Repúblika, Francisco Guterres Lú Olo, promulga ona lei Orsamentu Jerál Estadu (OJE) 2022.

Notísia Relevante: PN haruka ona proposta OJE 2022 ba Prezidente Repúblika

Tuir Konstituisaun haruka (liuhusi artigu 115, n°1, alínea d) no artigu 145°, n°1), tinan-tinan, Governu mak iha kbiit atu prepara proposta-Lei refere ba Orsamentu Jerál Estadu (OJE).

Governu hato’o proposta-Lei kona-ba OGE 2022 ba Parlamentu Nasionál iha 15 outubru 2021, ho montante $1,675,000.000.

“Tanba deputadu sira aprova proposta foun liu 100 durante diskusaun espesialidade, Parlamentu Nasionál hato’o Dekretu kona-ba OJE 2022 ba Prezidente Repúblika ho montante total $2,17,328.791,” refere komunikadu imprensa ne’ebé Agência Tatoli asesu hosi Palásiu Prezidensiál Nicolau Lobato, Bairru Pite, Dili, segund ane’e.

Hafoin tetu kle’an Dekretu kona-ba Orsamentu Jerál Estadu ba tinan 2022, Prezidente Repúblika Francisco Guterres Lú Olo, ho kbiit konstistusionál promulga Diploma n°55/V ne’ebé dekreta hosi Parlamentu Nasionál, iha 16 dezembru liubá. 

Ho promulgasaun hosi Prezidente Repúblika, lei ne’e tama ein-vigor iha loron tuir kedas publikasaun iha Jornál Repúblika ho efeitu hosi 01 janeiru 2022.

Tama iha Orsamentu Jerál Estadu 2022 reseita no despeza Estadu nian, inklui fundu no servisu sira autónomu no orsamentu seguransa sosiál.

Orsamentu 2022 sei tau matan ba prioridade nasionál neen mak: 1) dezenvolvimentu kapitál umanu (edukasaun, formasaun profisionál no saúde); 2) abitasaun no inkluzaun sosiál; 3) setór produtivu sira (agrikultura no turismu), ambiente no konetividade; 4) dezenvolvimentu setór privadu; 5) dezenvolvimentu rurál no 6) boa governasaun.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here