Kapitaun Fragata, Joao da Silva, komandante komponente Naval. Imajen Tatoli/Antonio Dasiparu

DILI, 12 dezembru 2022 (TATOLI)— FALINTIL-Forsa Defeza Timor-Leste (F-FDTL), liuhosi Komponente Navál, fulan ne’e, deteta ró 60 halo peska ilegál iha tasi-mane.

“Liuhosi sistema detesaun automatika Skylight ne’ebé Komponente Naval iha, konsege deteta  iha ro hamutuk 60 mak halo peska ilegál iha fulan ne’e, iha ita nia tasi Kosta Súl Timor-Leste”, Komandante Komponente Navál Forsa Lijeira, Kapitaun Fragata João da Silva, ba jornalista sira  hafoin serémonia anivesáriu Komponente Navál dala-20 iha Hera, kuarta ne’e.

Notísia Relevante:MD loke ona konkursu ba manutensaun ró navál   

Ró 60 ne’e ne’ebé halo atividade peska ilegál hosi nasaun viziñu sira hanesan Thailandia no Vietname.

“Sistema ne’e kada loron halo detesaun otomátika ró hira mak tama husi nasaun ne’ebe no ro tama ne’e medida hira. Ami print out hodi relata rezulta ne’e ba ita nivél altu sira, maibé prontu ita nian kondisaun mak ne’e,” Kapitaun Fragata ne’e akresenta.

Maski nune’e, Komandante ne’e akresenta nuudar forsa armada ne’ebé halo atividade no kontrola másimu iha tasi-timór kontinua toma responsabilidade, maibé fasilidade la sufisiente.

“Atu hola fasilidade hodi kontrola ita nian tasi ne’e, kabe ba iha polítiku sira, ba kazu ne’e Governu sira atu hola ka la hola, importante ami nian misaun kontinua relata saida mak akontese iha tereñu,” nia akresenta.

Tuir dadus hosi Governu liuhosi Ministériu Agrikultura no Peska (MAP), iha tinan 2018 ró peska ilegál hamutuk unidade 107 mak tama tasi Timór hodi na’ok ikan ho tonelada 223 ne’ebé koverte ba osan karik kuaze millaun $1.

Enkuantu, iha tinan 2019, MAP indetifika ró unidade 67 mak tama iha tasi timór halo atividade peska ilegál, ne’ebé ikan lakon hamutuk tonelada 100-resin, konverte ba osan hamutuk $800.000.

Notísia Relevante:  MAP Rejista Tinan Rua Ikus Ró Ilegál 170 Tama Tasi Timór

 Tinan 2018, Timor-Leste lakon ikan tonelada 223

Jornalista : Natalino Costa

Editór       : Florencio Miranda Ximenes

PUBLISIDADEiklan