Atividade peska ilegál. Imajen/Espesiál

DILI, 15 juñu 2020 (TATOLI) – Diretór Jerál Peska  Ministériu Agrikultura no Peskas (MAP), Acacio Guterres, informa iha tinan rua ikus ne’e rejista ró ilegál hamutuk 170 maka tama Tasi Timór.

“Iha 2020 ami seidauk elabora didi’ak maibé husi 2018 ita haree katak bazeia ba informasaun ne’ebé ami hetan liuhosi satelit katak ró unidade 107 maka  tama ilegál, ne’ebé karik ita konfirma tau ba osan karik hamutuk millaun $1,1 no iha 2019 ita hetan ró unidade 63 maka tama ilegál,” tenik Dirijente ne’e ba Agência Tatoli, iha MAP, Comoro, foin lalais ne’e.

Nia dehan, esforsu ne’ebé maka Diresaun Jerál Peska halo atu kombate ró tama ilegál maka normalmente servisu hamutuk kompontente navál hamutuk ho polísia marítima. 

Diretór ne’e iha esperansa ministru foun bele tau prioridade ba kestaun peska ilegál no bele fó apoiu másimu ba komponente rua ne’e atu kontrola másimu iha tasi.

Tuir Acacio Guterres, MAP iha ona planu ne’ebé atu tau iha orsamentu maibé iha debate sempre la tau prioridade tanba Governu iha ona prioridade seluk.

“Tinan-tinan ita sempre aprezenta maibé tinan 2021 ho ministru foun sei aprezenta filafali progama sira ne’e, liuliu  hola ró tanba uluk iha planu atu hola ró boot ne’ebé atu ba halo kontrolu iha área súl ne’ebé sempre iha peska ilegál,” nia reforsa.

Hatan ba kestaun ne’e, Ministru Agrikultura no Peska, Pedro Reis hateten nia parte nu’udar membru Governu foun sei responsabliza ba área agrikultura no peska, sei defende programa ne’e iha Parlamentu.

Nia konsidera kestaun peska ilegál nesesáriu tebes tanba ne’e presiza iha ró atu komponente sira halo patrullamentu no promete iha ninia mandatu sei tau importánsia ba kestaun ne’e.

“Ita hatene katak ita-nia área tasi ne’e luan tebes , entaun ita ho ita-nia ró-oan sira ne’e sei labele proteza liuliu ema sira ne’ebé maka halo peska ilegál sira iha ne’ebá. Entaun hakarak ka lakohi hanesan Ministériu Agrikuktura no Peskas pelu menus tenke iha fasilidade ne’ebé maka sufisiente atu nune’e bele halo servisu ho di’ak”, subliña governante ne’e.

Jornalista : Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here