Ró Navál ne’ebé avaria. imajen/espesiál

DILI,10 janeiru 2022 (TATOLI)— Diretór Jerál Administrasaun Ministériu Defeza (MD), Nuno Carvalho dos Santos, informa, daudaun loke ona konkursu públiku atu halo manutensaun ba ró navál Jaco no Betano hodi fasilita Komponente Navál, FALINTIL-Forsa Defeza Timor-Leste (F-FDTL) hala’o operasaun hodi asegura no kontrola fronteira tasi liuliu riku-soin sira.

“Ita aloka orsamentu milliaun $2, halo manutensaun ba ró rua ne’e, atu fasilita Komponente Navál bele halo operasaun,” Diretór Jerál ne’e, informa ba jornalista iha edifísiu Ministériu Defeza, Fatuhada Dili, segunda ne’e.

Notísia Relevante: Komponente Naval Presiza Meius Hodi Kontrola Fronteira Tasi

Ró komponente Navál rua hanesan Jaco no Betano hanesan meiu ho klase Shanghai ne’ebé Governu hola hosi Xina, dezde 2015 to’o agora sofre manutensaun ka avaria.

“Ita loke hela konkursu ba manutensaun ró rua ne’e. Ami seidauk simu dokumentu hosi kompañia tanba foin mak ita loke konkursu, maibé ita haree kompañia barak mak  interesadu hodi kompete ba ida ne’e,” nia akresenta.

Orsamentu fiskál 2022 ba Ministériu Defeza hamutuk $10,934,731, ne’ebé  fahe ba kategoria salariu no vensimentu $1,404,635, bens no servisu $6,278,204, kapitál menor $1,761,642, kapitál dezenvolvimentu $1,490,250. Orsamentu ne’e finansia programa tolu,sub programa lima no atividade 21.

Programa defeza nasionál prevee $8,796,389, ho nia objetivu médiu prazu atu populasaun Timor-Leste seguru no proteje kontra amesa externa.

Ho nia Sub-programa defeza militár ho ninian atividade mak koopersaun defeza militár, dezenvolve sistema komandu no kontrola, dezenvolve no kapasita sistema autoridade marítima, konstrusaun infraestrutura foun, defeza no militár, reparasaun no manutesaun infraestrutura, ekipamentu no arma militár, reparasaun no manutesaun ekipamentu ró no atividade asisténsia saúde militár.

Kona-ba sub-programa formasaun no dezenvolvimentu rekursu umanu iha área defeza no seguransa, ho ninian atividade mak formasaun no kapasitasaun rekursu umanu ministériu defeza no F-FDTL rekrutamentu militár no funsionáriu ministériu defeza.

Enkuantu, Programa boa-governasaun no jestaun institusionál alokadu $2,063,461 ho nia sub-programa rua no atividade sia.

Nune’e mós, programa igualidade jéneru no inkluzaun sosiál prevee $74,881, ho ninian sub-programa implementasaun NAP-rezolusaun 1325 (200) ONU kona-ba WPS , ho ninian atividade promove lideransa ho kapasidade feto iha área F-FDTL hodi hala’o sosializaun ba insentiva feto militár ne’ebé implementa abordajen integradu.

Nune’e, Nunu Carvalho garante, iha semestre dahuluk ezekusaun orsamentu Ministériu Defeza nian liuliu ba manutensaun ró navál rua tenke finaliza.

“Ha’u hanoin orsamentu ba manutensaun ne’e sufisiente tanba prevee bazeia ba estudu,” nia garante.

Notísia Relevante: Komponente Naval Presiza Meius Hodi Kontrola Fronteira Tasi

Jornalista : Natalino Costa   

Editór      : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here