Imajen/Media PR.

DILI, 10 janeiru 2022 (TATOLI)—Parlamentu Nasionál (PN), segunda ne’e, aprova proposta-lei enkuadramentu orsamentu estadu no jestaun finanseira públika iha finál globál ho rezultadu votasaun a-favór 37, kontra 0 no abstensaun rua (2).

Notísia Relevante: Proposta-lei enkuadramentu orsamentál konsagra ho prinsípiu 11

“Nune’e proposta-lei númeru 27/V/3a, enkuadramentu orsamentu estadu no jestaun finanseira públika aprova iha finál globál no husu ba Komisaun C Finansa Públika bele trata redasaun finál,” Prezidente Parlamentu Nasionál, Deputadu Aniceto Longuinhos Guterres Lopes, deklara liuhosi plenária, Parlamentu Nasionál.

Bainhira komisaun C ramata halo redasaun sei haruka ba meza Parlamentu nasionál hafoin sei submete ba Prezidente Repúblika hodi halo promulgasaun.

Hafoin votasaun, iha proposta hosi deputadu opozisaun CNRT husu atu halo re-abertura ba artigu lima hanesan 8, 9, 10, 11 no 12 maibé parte deputadu CNRT hotu la marka prezensa ka auzente, nune’e meza plenária konsidera proposta rekerimentu ne’e retiradu ona.

Governu liuhosi Ministériu Finansa propoin halo revizaun ba númeru 3/2009 kona-ba Lei Orsamentu no Jestaun Finanseira (LOGF-sigla portugés), no iha proposta-lei foun ne’e mantein artigu hamutuk 16, altera artigu hamutuk 22, retira artigu 17.

Entretantu proposta-lei foun ne’e aumenta tán artigu 61 kompara ho lei númeru 13/2009, nune’e proposta-lei foun ne’e iha artigu hamutuk 116 kompara ho artigu 55 iha lei vijente.

Preámbulu hosi proposta-lei foun ne’e introús ho objetivu prinsipál rua mak ajiliza (agilizar) iha jestaun públika no hasa’e transparénsia, responsabilidade, prestasaun konta, kontrolu serbisu no entidade sira iha setór públiku administrativu.

Antes ne’e, Ministru Finansa, Rui Augusto Gomes, esplika razaun halo revizaun tanba iha limitasaun no lákuna, tanba ne’e mak iha proposta-lei foun introdús prinsípiu 11 ne’e kompostu hosi unidade no universidade, anualidade no plurianualidade, estabilidade no sustentabilidade orsamentál, prinsípiu efikásia ekonomia no efisiénsia, transparénsia, responsabilidade, ekidade interjerasionál, programasaun despeza, espesifikasaun no la kompensasaun.

Perímetru orsamentál la’ós de’it iha retratu di’ak ida kompletu kona-ba despeza maibé atu redús despeza públika ba entidade sira-ne’ebé la inklui iha OJE, atu nune’e entidade sira-ne’e bele moris mesak ka auto-sustentabilidade.

Elementu importante ida hosi proposta-lei mak previzaun orsamentasaun por programa, ne’ebé atu vinkula inskrisaun dotasaun ho atividade ne’ebé prevee ona iha planu anuál kada serbisu no entidade, nune’e iha OJE la aprezenta de’it despeza maibé tenke hatene mós objetivu atu atinje ho despeza ne’ebé gasta.

“Ita sei halo, kuandu ita reforsa ona relasaun planu no orsamentu mak sei fásil atu halo avaliasaun kona-ba efisiénsia no efikasia despeza públika, no sei obriga servisu no entidade sira-ne’ebé la kumpre objetivu sira-ne’e,” nia dehan. 

Nia esplika, orsamentu ida presiza mantein ekilibru entre nesesidade transparénsia ho risku bainhira aprezenta informasaun barakliu, sei la inklui sub-programa hotu iha OJE atu evita dokumentu ne’e sa’e boot liután.

Ministru Finansa ne’e fó ezemolu, iha OJE 2021 aprezenta de’it programa no iha tabela tolu (3) iha ona pájina 18, no lei ne’e rasik iha pájina 37, karik mak aumenta tán ho sub-programa mak tabela ne’e sei sa’e pájina 81 no lei ne’e rasik sei aumenta ba pájina 100.

“Ho orsamentasaun bazea ba programa ita sei uza orsamentasaun botton up no mós kombinasaun ho top down, botton up ida ne’e katak dotasaun orsamentál bazea ba atividade sira-ne’ebé prevee iha planu anuál kada servisu no entidade,” nia dehan.

Notísia Relevante: Komisaun C aprova proposta Lei Enkuadramentu Orsamentál iha espesialidade

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here