Prezidente Komisan C, Deputada Maria Angelica Rangel. Imajen/Antonio Goncalves

DILI, 18 agostu 2021 (TATOLI—Komisaun C ne’ebé trata asuntu Finansa Públika aprova ona proposta Lei Enkuadramentu Orsamentál iha espesialidade.

Notísia Relevante: PN sei diskute kle’an proposta-lei enkuadramentu orsamentál

Prezidente Komisaun C, Deputadu Maria Angélica Rangel, haktuir proposta-lei ne’e termina ona debate espesialidade iha semana kotuk ne’ebé hala’o iha Suku Tibar, Postu Administrativu Bazartete, Munisípiu Liquiça.

Nia dehan, iha debate espesialidade ne’e partidu opozisaun fó kontribuisaun maka’as no vota a-favór iha artigu balun maibé sira husu rekursu ba plenária hamutuk artigu 11. Parte bankada Governu husu rekursu ba artigu ida (1) mak tenke iha konsensu iha plenária.

“Ne’ebé debate espesialidade ne’e ami termina ona no oras ne’e iha prosesu atu finaliza ami-nia relatóriu no paresér atu submete ba Prezidente Parlamentu Nasionál no Prezidente Parlamentu Nasionál mak iha kompeténsia halo ajendamentu hodi debate iha finál globál,” Prezidente Komisaun C, Deputada Maria Angélica Rangel, informa ba jornalista sira, iha resintu uma fukun, kuarta ne’e.

Proposta Governu nian aprezenta ba Parlamentu Nasionál ho artigu hamutuk 116 maibé diskusaun espesialidade iha aditamentu, alterasaun no sai fali artigu hamutuk 126 iha Lei Enkuadramentu Orsamentu Jerál Estadu no Jestaun Finanseira Públika ne’e, bainhira proposta-lei foun ne’e sai ba Lei sei revoga Lei númeru 13/2009 kona-ba Lei Orsamentu no Jestaun Finanseira (LOGF-sigla portugés).

Nia fundamenta, tempu to’o ona hadi’a tanba LOGF eziste dezde 2013 entaun tenke muda lei ne’e tanba liu ona dékada ida.

Alterasaun substansiál ne’e, nia dehan, importante tebes atubele hatán ba limitasaun sira iha lei vijénsia.

Lejizlasaun esensiál ne’e sai nu’udar fasilitadór ba jestaun finanseira no labele sai fali obstakúlu ba dezenvolvimentu funsaun Estadu nian, tanba ne’e importante atu hakat-liu limitasaun sira-ne’ebé impede Estadu atu ezekuta orsamentu Estadu kada tinan.

Prezidente Komisaun C ne’e fó-sai katak, alterasaun ba kuadru jurídiku Orsamentu Jerál Estadu nian no jestaun finansa públika sai nu’udar oportunidade atu inkorpora prátika internasionál sira-ne’ebé di’akliu kona-ba orsamentasaun no transparénsia.

Nia hateten, sesaun plenária ba diskusaun no votasaun iha finál globál ba proposta-lei ne’e posibilidade sei realiza iha fulan-setembru bainhira PN retoma resesu.

Notísia Relevante: MF fundamenta proposta Lei Enkuadramentu Orsamentál ba Komisaun C

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here