Ministru Finansa, Rui Augusto Gomes. Imajen TATOLI/António Gonçalves

DILI, 05 jullu 2021 (TATOLI)—Governu liuhosi Ministériu Finansa (MF) instrodús prinsípiu sanulu-rein-ida (11) iha proposta-Lei Enkuadramentu Orsamentál (LEO) no jestaun finanseira públika.

Proposta-lei enkuadramentu orsamentál no jestaun finanseira públika konsagra ho prinsípiu orsamentál sira-ne’ebé konsta iha Lei Orsamentu no Jestaun Finanseira (LOGF-sigla portugés) tanba LOE ne’e substitui LOGF iha futuru bainhira promulga hosi Prezidente Repúblika.

Ministru Finansa, Rui Augusto Gomes, argumenta ho prinsípiu 11 ne’e katak alterasaun substansiál ba lei númeru 13/2009 inklui definisaun perímetru OJE tanba laiha klareza kona-ba perímetru OJE mak defisil tebes atu garante katak OJE reprezenta reseita no despeza tomak setór públiku administrativa.

“Karik ida-ne’e mak ita hadi’ak lákuna hirak-ne’e tanba ita la konsege hetan imajen di’ak ida no kompletu kona-ba situasaun finansa públika no bele impede prátika dezorsamentasaun,” Governante ne’e esplika ba deputadu iha debate proposta-lei refer iha jeneralidade, iha uma fukun, segunda ne’e.

Revizaun ba lei númeru 3/2009 kona-ba Lei Orsamentu no Jestaun Finanseira (LOGF-sigla portugés) ne’e Governu ne’e propoin mantein artigu hamutuk 16 hosi lei númeru 13/2009, altera artigu hamutuk 22, retira artigu 17.

Entretantu proposta-lei foun ne’e aumenta tán artigu 61 kompara ho lei númeru 13/2009, proposta-lei foun ne’e iha artigu hamutuk 116 kompara ho artigu 55 iha lei vijente (LOGF).

Prinsípiu 11 (sanulu-resin-ida) ne’e kompostu hosi unidade no universalidade, anualidade no plurianualidade, estabilidade no sustentabilidade orsamentál, prinsípiu efikásia ekonomia no efisiénsia, transparénsia, responsabilidade, ekidade interjerasionál, programasaun despeza, espesikasaun no la kompensasaun.

Prinsípiu dahuluk ne’ebé sita iha relatóriu no paresér Komisaun C ne’ebé trata asuntu Finansa Públika liderada Deputada Maria Angélica Rangel, esplika unidade no universidade ne’ebé ejize hosi Konstituisaun RDTL artigu 145, katak Governu mak halo Orsamentu Jerál Estadu nian no Parlamentu Nasionál mak sei fó aprovasaun, lei orsamentu nian tenke prevee ho baze iha efisiénsia, efikásia, diskriminasaun reseita, despeza nian.

Nune’e mós sees hosi dotasaun no fundu sekretu sira, ezekusaun orsamentu sei iha fiskalizasaun hosi Tribunál Superiór Administrativu Fiskál no Kontas no hosi Parlamentu Nasionál.

Prinsípiu daruak kona-ba anualidade no plurianualidade ne’e previstu hodi espresa vertente programátika iha Orsamentu Jerál Estadu ne’e halo siklu foun iha planeamentu tinan-lima nian (la’ós tinan-tolu ona), ne’ebé refere iha proposta-lei foun ne’e, períodu komplementár ezekusaun orsamentál to’o 31 dezembru.

Prinsípiu dahaat kona-ba estabilidade no sustentabilidade orsamentál ne’e previstu hodi evolui prinsípiu ekilíbriu sentradu iha kontabilidade kaixa, hodi fó sustentabilidade no finansia kompromisu sira.

Prinsípiu dalima kona-ba ekonomiia, efisiénsia no efikásia katak presiza utiliza rekursu mínimu hodi mellora rezultadu ezekusaun.

Prinsípiu daneen kona-ba transparénsia katak Governu pretende asegura koñesimentu hosi parte hotu-hotu, inkuli públiku ein-jerál liuhosi informasaun ne’ebé di’akliu iha aprovasaun no ezekusaun OJE.

Prinsípiu dahitu kona-ba responsabilidade, katak iha estadu ida-ne’ebé iha pesoa koletiva ne’ebé barakliu nune’e lei foun ne’e sei ejize responsabilidaden ezekusaun tenke efikásia no efisiénsia.

Prinsípiu daualu ekidade interjerasionál, katak ezekusaun orsamentál kada tinan tenke komplementa ho prinsípiu ekilíbriu.

Prinsípiu dasia kona-ba programasaun despeza, katak atribuisaun osan públiku tenke dettermina ho korreta no pretende koerente planifikada.

Prinsípiu sanulu kona-ba espesifikasaun no la kompensasaun, katak ezekusaun orsamentál tenke klareza, detalla no armónia kontabilístika iha reseita no despeza ne’ebé Orsamentu Jerál Estadu.

Prinsípiu sanulu-resin-ida kona-ba não consignação (la konsignasaun) katak reseita ne’ebé taka despeza tenke hatene tuir kada tinan.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here