Treinadór Prinsipál Selesaun Nasionál Timor-Leste, Fabio Maciel. imajen/ FFTL

DILI, 10 janeiru 2022 (TATOLI)– Adjuntu Sekretáriu Jerál Federasaun Futeból Timor -Leste (FFTL), Frederico Martins, informa, loloos kontratu ne’ebé FFTL selebra ho treinadór prinsipál selesaun nasional U-23 no senior, Fabio Maciel, ramata ona iha 31 dezembru 2021, maibé ezekutivu FFTL deside estende tan ba, loron 31 dezembru 2022.

“Kontratu ba treinadór Fabio ita estende tan to’o 31 dezembru 2022 ho alvu prinsipál mak jogu AFF U-23 2022, tenke ba to’o semi finál, bainhira la to’o mak ita sei halo revizaun ba nia kontratu,” Adjuntu Sekretáriu Jerál ne’e, hateten ba Agência TATOLI via rede sosiál, segunda ne’e.

Notísia relevante: Ekipa Timor-Leste la konsege konkista vitória iha Suzuki Cup 2021

Adjuntu Sekretariu Jerál FFTL, Frederico Martins. Imajen Tatoli/ Hortencio Sanches

Razaun, FFTL hanaruk kontratu ba treinadór prinsipál ne’e tanba iha jogu AFC CUP 2021, iha fulan-outubru liubá ne’e hatudu rezultadu la aat liu no la di’ak liu. Tanba Timor-Leste kontra Singapura konsege empate 2-2, kontra Korea Súl lakon 6-0 no kontra Filipina lakon ho 1-0.

Enkuantu, iha jogu AFF Suzuki Cup 2021, fulan-dezembru liu ba falla konkista vitória tanba iha jogu kontra Thailandia lakon 2-0, Kontra Filipina lakon 4-0 no kontra Singapura nafatin lakon 2-0.

Adjuntu Sekretáriu Jerál ne’e, akresenta hare ba rezultadu hirak ne’e hotu la fó duvida ba FFTL atu kontinua mantein Fabio Maciel hanesan treinadór prinsipál ba selesaun nasionál.

“Ami la fó sai salariu hira mak kada fulan oferese ba treinadór ne’e tanba konsidera konfidensiál,” nia akresenta.

Treinadór ho nasionalidade Barzileiru ne’e hamutuk ho FFTL hahú 2015 to’o 2016, maibé iha tinan 2017, FFTL kontrata fali treinadór ida hosi Japaun, Norio Tsukitate ne’ebé nafatin la fó susesu iha jogu internasionál sira.

Nune’e, iha tinan 2019, FFTL kontrata fali treinadór hosi Portugál, Fabiano Flora, maibé nafatin la susesu.

Tanba ne’e, iha 2020, FFTL deside kontrata no fó fiar fali ba Fabio Maciel, ne’ebé konsege halo mudansa tanba Timor-Leste ladun sofre ona golu barak hanesan tinan 2019 ba kotuk.

Daudaun, treinadór Fabio fó nafatin treinamentu ba selesaun nasionál U-23 hodi bele ba kompete iha jogu rejionál AFF U-23, ne’ebé sei hala’o 14 to’o 26 fevereiru 2022 ne’ebé sei hala’o iha Cambodia.

Iha jogu ne’e, Timor -Leste tama iha grupu A hamutuk ho uma-na’in Cambodia, Filipina no Sigapura.

Notísia relevante: Timor-Leste tama grupu A iha AFF CUP 2022

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here