Sekretáriu Jerál FFTL, Nelio Isaac Sarmento. imajen/media FFTL

DILI, 29 dezembru 2021 (TATOLI)– Eis Sekretáriu Jerál Federasaun Futeból Timor-Leste (FFTL), Nelio Isaac Sarmento, informa, bazeia ba sorteiu ne’ebé dada iha Singapura, ohin, ba jogu U23 Asian Football Federation (AFF) 2022 Timor-Leste tama iha grupu A.

“Kompetisaun AFF U-23 ne’ebé sei halo iha Cambodia, hahú husi loron 14 to’o 26 fevereiru 2022. Ita hamutuk ho Cambodia, Filipina no Brunei Darusalam,” Eis Sekretáriu Jerál ne’e, hateten ba Agência TATOLI via rede sosiál, kuarta ne’e.

Jogu AFF U23 sei hala’o iha Cambodia no sei partisipa hosi nasaun hamutuk 11, hanesan  Indonezia, Singapura, Laos, Brunei Darusalam, Myanmar, Filipina, Cambodia, Thailandia, Malazia, Vietname no Timor-Leste.

Grupu B kompostu hosi Indonezia, Malazia, Myanmar no La’os. Enkuantu grupu C kompostu hosi Thailandia, Vietname no Singapura.

Nelio Isaac dehan, ekipa Timor-Leste seidauk iha preparasaun tanba treinadór prinsipál Fabio Macel da Silva sei goja hela direitu feriadu.

“Iha fulan, Janeiru 2022, nune’e mak foin hahú fali treinamentu, maibé planu atu hala’o treinamentu iha rai liur. Se Governu hanoin apoia tan osan ruma di’ak liután,” Nelio akresenta.

Notísia relevante:  Ekipa Timor-Leste la konsege konkista vitória iha Suzuki Cup 2021

Jornalista: Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here