Primeiru-Ministru, Taur Matan Ruak, halo diálogu komunitáriu iha munisípiu Lautém, sesta (07/01). Imajen TATOLI/Jogerjo Guterres

LAUTÉM, 09 janeiru 2022 (TATOLI)— Oitavu Governu Konstitusionál ne’ebé lidera hosi Primeiru Ministru, Taur Matan Ruak, kada tinan fó subvensaun públiku millaun $15 ba Igreja Katólika liuhosi Konferénsia Episkopál Timorense (CET,sigla Portugés).

Subvensaun públika ne’e bazeia entre Estadu Santa Sé no Repúblika Demokrátika Timor-Leste (RDTL) iha loron 14 agostu 2015. Akordu ne’e ko’alia kona-ba saida mak Estadu no uma-kreda presiza hamutuk atu dezenvolve Timor-Leste.

“Durante, ha’u-nia mandatu tinan tolu ikus ne’e, kompostu hosi 2021, 2022 no 2023, kada tinan ha’u fó millaun $15 ba Konferénsia Episkopál, entaun ne’e igreja mak jere. Ha’u hanesan primeiru-ministru ha’u labele lori proposta sira hosi Igreja nian ba Parlamentu Nasionál, maibé Igreja bele haruka proposta ba Parlamentu. Tanba ne’e mak ha’u labele aseita proposta hosi sarani sira,bainhira husu atu harii Igreja, ne’ebé atu dehan governu laiha inisiativa no la tau osan atu harii igreja, osan iha karik bainhira parlamentu mak deside no governu iha obrigasaun atu transfere de’it ba konferénsia episkopál,” PM Taur, hateten, bainhira hala’o diálogu ho populasaun Lautém, iha Merkadu Lama, munisípiu Lautém, sesta  foin lalais ne’e.

Notísia Relevante:  GASC transfere ona millaun $2,5 ba konstrusaun igreja  Aimutin Dili

Estadu Timor-Leste rekoñese papél Igreja nian, atu haforsa parseria liuhosi  haforsa iha área Edukasaun, Saúde, no área lubuk ida, nune’e governu halo parseria ho Igreja inklui konstrusaun ba Igreja sira.

Durante, Governasaun anteriór to’o mai Governu da-ualu konstrui igreja barak, alende ne’e kada tinan governu halo transferénsia osan ba igreja katólika millaun $1,5, no halo tan igreja, hanesan igreja katedral Dili, Balide, Becora, Viqueque no fatin barak.

Governu asina tiha konkorda ida ho Santa Sé ne’ebé iha konkordata ne’e, hateten atividade Igreja nian Governu transfere osan ba iha konferénsia Episkopál atu halo atividade sira ne’ebé a-favór  ba populasaun sira nian.

Xefe Governu ne’e hatutan, durante mandatu Governu da-ualu nian bainhira hala’o reuniaun ho Bispu dioseze tolu haktuir másimu ne’ebé Governu tenke fó ba iha konferénsia episkopál mak millaun $15.

“Ha’u dehan ha’u la fó hotu osan ne’e, fó balun de’it restu ne’e, ha’u hakarak igreja sira ne’e halo hotu kuandu hotu ona mak transfere osan ba konferénsia episkopál mak halo igreja,” PM Taur akresenta.

Xefe Governu hatutan, iha tinan 2021,  husu atu konstrusaun igreja sira bele hotu, maibé Igreja Aimutin no Sentru Akadémia múzika la halo hotu. 

“Osan ne’ebé hela ami foti fó hotu ba konferénsia episkopál atu jere, Governu la halo tan ona igreja iha Timór-laran, karik halo tenke husu autorizasaun konferénsia Episkopál autoriza,” Xefe Governu afirma.

Parlamentu Nasionál sira deside, iha tinan 2021 ho orsamentu rihun $75 atu halo kapela iha Uai-Mori, Bairru-Pite, tanba Parlamentu mak deside governu tenke ezekuta, maibé governu ezekuta tenke ba konvense fali konferénsia Episkopál, kuandu aseita mak governu foti osan ne’e lori ba entrega, hafoin konferénsia episkopál mak jere, governu la jere ona.

Enkuantu, durante diálogu Xefe Governu ne’e ho komunidade Lautém reprezentante sarani Lautém husu atu Governu hadi’a sira-nia igreja, no biban ne’e reprezentante ne’e mós entrega proposta ba Xefe Governu.

Notísia Relevante: GASC transfere millaun $1.8-resin ba konstrusaun igreja Becora 

Jornalista : Antónia Gusmão.

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here