Natar iha Uatulari, Viqueque. Imajen TATOLI/Vitorino Lopes da Costa

VIQUEQUE, 08 janeiru 2022 (TATOLI)—Primeiru-Ministru, Taur Matan Ruak, no komitiva halo vizita ba munisípiu Viqueque no realiza diálogu komunitáriu hodi rona preokupasaun autoridade no komunidade lokál, ne’ebé maioria hato’o preokupasaun kona-ba irrigasaun a’at difikulta hasa’e produsaun lokál.

“Povu Uatulari nia natar lubuk ida mak husik abandonadu tanba irrigasaun ladi’ak, tanba ne’e husu ba Ministériu Agrikultura no Peska bele hadi’a irrigasaun hodi sira halo natar, nune’e bele hasa’e produsaun lokál,” Administradór postu administrativu Uatulari, Manuel do Rosário, hateten, bainhira partisipa iha diálogu komunitáriu, iha edifísiu Administrasaun Viqueque, sábadu ne’e.

Iha fatin hanesan, Xefe suku Uaimori, Francelino Antonio Gomes, akresenta, iha suku Uma-uain kraik iha natar barak mak abandona, nune’e husu entidade kompetente tau atensaun urjente.

“Natar hamutuk ektare 175 lokaliza iha suku Uma-uain kraik mak abandona tanba laiha irrigasaun,” Autoridade lokál ne’e informa.

Notísia relevante: OJE 2022: MAP fó prioridade ba manutensaun irrigasaun

Nune’e mós, Diretór Agrikultura munisípiu Viqueque, Carlos Pinto, haktuir, bazeia ba rezultadu sensu agríkola, populasaun Viqueque 78% mak hala’o atividade agrikultura, tanba ne’e presiza kria kondisaun atu komunidade lokál bele hasa’e produsaun.

“Maski maioria iha Viqueque hala’o atividade agrikultura, maibé Governu sempre halo importasaun foos, enkuantu Viqueque iha área potensiál agrikultura ektare 9.000-resin, maibé foin dezenvolve de’it ektare 4.234. Área potensiál iha Viqueque seidauk bele dezenvolve hotu tanba laiha kondisaun, tanba ne’e sempre iha importasaun foos no tinan ida produtividade iha rai ektare haat prodús tonelada hitu to’o sia, ne’e ba populasaun munisípiu de’it la to’o,” nia tenik.

Aleinde ne’e, natar barak abandonadu tanba durante ne’e depende de’it udan-been no iha abitante lokál la halo produsaun agíkola tanba laiha merkadoria.

“Sentru Lojíztika Nasionál (CLN, sigla portugés) sosa produtu lokál maibé la sufisiente, entaun populasaun halo natar tuir forsa hodi konsomu de’it. Normalmente agrikultór Viqueque kada tinan halo natar dala-rua, maibé époka daruak mak barak, dahuluk ladún. Hanesan Viqueque de’it foin mak prodús tinan ida tonelada 17.000, ne’ebé  atu sura ba konsumu de’it seidauk to’o tanba ne’e presiza duni importasaun,” nia akresenta.

Alokasaun orsamentu ba setór agrikultura iha Viqueque kiik

Diretór Agrikultura Viqueque konsidera alokasaun orsamentu ba setór agrikultura kiik tebes, la to’o 1%, nune’e difikulta atu hasa’e taxa produsaun lokál.

“Iha Viqueque, osan ne’ebé alokadu iha área agrikultura $6.000 de’it, ne’e ami labele halo buat ida. Iha kombustível gratuita hosi nasionál no apoia téknika ba agrikultór sira, maibé hakarak produtu tenke investe maka’as iha setór agrikultura,” nia tenik.

Kona-ba tratór liman ne’ebé destaka iha Viqueque iha 178 no tratór boot 39, maibé ualu de’it mak halo operasaun no hetan mina gratuita.

“Mina gratuita ba tratór boot ne’e fó família ne’ebé presiza liu, la’ós ba ema hotu tanba sei labele kobre ba ema hotu. Atu hasa’e produsaun iha Viqueque la’ós ema ida de’it maibé pakote ida, kondisaun natar, fini di’ak, aimoruk di’ak no prosesu kuda. Ko’alia kona-ba hasa’e produsaun, MAP nia orientasaun hasa’e produsaun tuir nesesidade ne’ebé iha tanba ba kestaun ne’e presiza serbisu maka’as, apoiu tékniku no ekipamentu sufisiente,” nia akresenta.

Diretór Agrikultura husu mós ba CLN no parseiru sira atu kontinua sosa produtu lokál, hanesan momentu sosa produtu ba programa Cesta Bázika.

Iha sorin seluk Servisu Agrikultura munisípiu Viqueque distribui fini ba agrikultór sira no daudaun prepara ona fini tonelada 17 no aimoruk atu distribui iha fevereiru 2022.

MAP esforsu rezolve irrigasaun

Ministru Agrikultura no Peska, Pedro dos Reis, hateten, parte ministériu halo esforsu rezolve irrigasaun.

“Loos duni iha postu Uatulari iha área pontensiál boot no iha duni irrigasaun boot ida iha Bebui maibé a’at, tanba ne’e iha tinan 2021 prevee ona osan no konstrusaun la’o hela, espera bele finaliza lalais,” Ministru dehan.

Iha mós irrigasaun boot ida iha Besoru, ne’ebé mak prosesu hadi’a besik ramata ona, ne’ebé tuir planu bainhira ramata sei halo espansaun natar kuaze ektare 700, iha irrigasaun kiik-oan sira iha fatin haat hanesan iha Saketu, Belia, Latumana no Watukusi, ne’ebé prosesu hadi’a submete ona ba Konsellu Administrasaun Fundu Infraestrutura (KAFI) no daudaun halo hela verifikasaun hodi loke konkursu.

Iha postu Uatucarbau irrigasaun iha Komoli, Lubere no suku Uaimori, Viqueque villa, daudaun ne’e KAFIhalo hela prosesu verifikasaun.

“Hanesan ministru ne’ebé tau-matan ba setór agrikultura, ha’u sente kontenti tanba komunidade sempre kestiona katak produtu folin laiha, entaun aproveita biban ne’e hakarak husu ba autoridade lokál hotu, katak Governu prevee orsamentu millaun $80 atu sosa produtu lokál entaun, husu ba ita hotu hamutuk ho ministériu no diresaun tomak serbisu maka’as hodi prodús produtu hodi salva osan sira ne’e labele sai ba rai-li’ur,” governante ne’e enkoraja.

Notísia relevante: Garante merkadoria, CLN enkoraja agrikultór Uatulari hasa’e produsaun lokál

Nune’e, Ministru husu atu autoridade no komunidade lokál atu identifika área potensiál sira hodi komunika ho entidade relevante, nune’e bele halo atendimentu emerjénsia.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here