Irrigasaun balun iha munisípiu. Imajen/PNDS

DILI, 23 novembru 2021 (TATOLI)—Ministéiru Agrikultura no Peska (MAP) prevee ona prevee $21,400,322 iha Orsamentu Jerál Estadu (OJE) 2022, hodi fó prioridade ba manutensaun no konstrusaun irrigasaun sira iha territóriu nasionál.

“Ita-nia prioridade tinan oin mak kontinua hadi’a eskema irrigasaun no agora halo hela projetu re-aproriasaun irrigasaun ualu (8) no rua (2) ne’ebé tenderizasaun la’o hela,” Ministru Agrikultura no Peska (MAP), Pedro dos Reis, hateten ba jornalista hafoin ramata sorumutu ho Prezidente Repúblika, Francisco Guterres Lú Olo, iha edifísiu Palásiu Prezidensiál Nicolau Lobato, Bairru Pite, Dili, tersa ne’e.

Irrigasaun re-aproriasaun no foun mak hanensan Maliana II, Webeba, Larisula, Kasa, Paulara, Hali Foun, Galata no Laivai.

Governante ne’e hateten, polítika MAP nian ba tinan oin nafatin hasa’e produsaun produtividade iha rai-laran, tanba ne’e presiza hadi’a infraestrutura irrigasaun hirak ne’e.

“Ba futuru atu bele atinje rihun 131 konsumu nasionál no mós ita hanoin ba área kultiva ne’ebé bee la sufisiente, planu atu halo barajen tinan ida prodúz dala-rua,” nia hateten.

Tuir livru 2 planu annual OJE 2022, MAP prioritiza programa ho kódigu 797 kona-ba argikultura ho nia sub-programa dezenvolvimentu infraestrutura no nia atividade mak manutensaun irrigasaun Maliana I, Maliana II, Mautalo, Marco, Atabae Loes, Lotan, Caraulun, Oebaba, Raibere, Laclo, Buluto, Bebui, Saketo, Belia, Kumoli, Waibati no  Larisula,  prevee orsamentu iha verba kapitál dezenvolvimentu $875,634, no konstrusaun kanál prinsipál no sekundária Ramaskora no irrigasaun Oebaba prevee orsamentu $277,002.

Iha OJE 2022, MAP prevee $21,400,322 aloka ba saláriu vensimentu $5,064,400, bens servisu $10,354,627, kapitál menór $3,881,175, kapitál dezenvolvimentu $1,705,120 no transferénsia públika $395,000.

Hosi Orsamentu Jerál Estadu 2022 ne’e, sei finansia ba programa rua, sub-programa 11 no atividade 44.

Orsamentu bazea programa

MAP iha programa boa-governasaun no jestaun instituisionál sei gasta $13,016,940 no programa agrikultura sei gasta $8,383,382.

Programa agrikultura ho nia objetivu sustentavél aumenta produsaun no produtividade iha sub-setór espesífiku agrikultura, ortikultura, pekuária, peska ba efisiénsia mellora kompetividade.

Ho nia sub-programa forsa traballu ba prestasaun servisu iha terrenu, sub-programa aumenta sustentavél produsaun planta industriál ho nia atividade estabelesimentu agrikultura integradu iha área pontensiál, atividade dezenvolve no mellora ortikultura komunitária, atividade subsídiu agrikultór, apoiu kultivu hodi promove prátika di’ak agrikulturaa, mobiliza grupu agrikultór no efetividade efikasia utiliza mákina agrikula apropriadu, apoiu inisiativa grupu joven feto no mane.

No, reabilitasaun expande diversifika no intensifika produsaun plantasaun kafé, operasionaliza sentru viveiru planta industrial, no iha mós sub-programa aumenta sustentavél produsaun animál.

Sub-programa dezenvolvimentou infraestrutura ho nia atividade dezenvolve infraestrutura akuakultura no operasionaliza sentru viveiru ikan, konstrusaun barreira, armazenamentu iha Mataodouro nasionál no Tibar, konstrusaun barreira protesaun no normalizasaun zona agríkula Bebui Uatulari, manutensaun irrigasaun Maliana I, Maliana II, Mautalo, Marco, Atabae Loes, Lotan, Caraulun, Oebaba, Raibere, Laclo, Buluto, Bebui, Saketo, Belia, Kumoli, Waibati no  Larisula no konstrusaun kanál prinsipál no sekundária Ramaskora no irrigasaun Oebaba.

Sub-programa aumenta sustentavél pordusaun no produtividade ba hahán no protudu ortikultura mak implementa armazenamentu no prosessamentu pós-koilleta ba apoiu prugu agrikultór.

Sub-programa transforma eskola ensinu tékniku agrikula ho profisionál orienta ba auto-empregu no merkadu traballu ho nia atividade kapasitasaun ba manorin-na’in ba eskola Natarbora no sira seluk.

Sub-programa aumenta sustentavél produsaun peskeira no akuakultura mak dezenvolve indústria no laboratóriu peska, dezenvolve produsaun ikan tilápia, kriasaun ba ikan no sira seluk.

Sub-programa konservasaun no jestaun rekursu naturál ho nia atividade dezenvolve paisajen mantein jardin botániku, estabelese liña perímetru provizóriu no permanente iha área protejidu, proteje floresta, dezenvolve sistema agro-floresta, operasionaliza sentru viveiru floresta no ai-parapa, dezenvolve no manutensaun poténsia eko-turizmu iha área protejidu.

Sub-programa dezenvolvimentu infraestrutura mak hanesan promove investimentu setór Floresta hanesan ai-kameli, ai-teka, mahoni, saria, bambu no seluk tán.

Entretantu, programa boa-governasaun no jestaun instituisionál ho sub-programa rua (2) no atividade ualu (8).

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here