CLN konvoka enkontru ho agrikultór Uatulari iha salaun Parokia Uatulari, kinta (23/12). Imajen TATOLI/Vitorino Lopes da Costa

VIQUEQUE, 23 dezembru 2021 (TATOLI)-Sentru Lojístka Nasionál (CLN) enkoraja agrikultór postu administrativu Uatulari, munisípiu Viqueque, atu hasa’e produsaun lokál tanba Governu garante ona merkadoria.

“Atu redús mukit no kiak iha Timor Leste, Governu liuhosi CLN prontu sosa produtu lokál. Tanba ne’e, ha’u husu povu agrikultór sira hodi hasa’e produtu tanba Governu oras ne’e garante merkadoria ba produtu lokál sira ne’ebé povu prodús,” Diretór ezekutivu CLN, Jacinto Paijo, hateten ba Agência TATOLI, iha salaun Parokia Uatulari, kinta ne’e.

Tuir Diretór Ezekutivu, durante ne’e Governu importa sosa foos, halo osan sai ba rai-li’ur, tanba ne’e Governu kria polítika hodi sosa produtu lokál atu osan sirkula fali ba povu agrikultór sira.

“Liuhosi sosa produtu lokál mak bele fó insentivu, atu provoka no dudu setór agrikultór hodi prodús barak liután. Ha’u hanoin Uatulari la presiza sosa foos hosi rai-li’ur tanba postu ne’e iha poténsia boot ba hare,” nia akresenta.

Notísia relevante: CLN Sosa Ona Produtu Hare Tonelada 86

Daudaun Governu prepara ona armazen hodi sosa produtu lokál hosi povu agrikultór no rai iha fatin ne’e.

“Ita la presiza buka serbisu iha kantor de’it, liuhosi agrikultór mós ita hetan osan. Tanba ne’e, imi prodús ba no ami prontu sosa ita-boot sira-nia produtu,” nia enkoraja agrikultór sira.

Bazeia ba despaisu hosi Ministériu Koordenadór Asuntu Ekonómia (MKAE) númeru 15/9/2021, Governu sei sosa produtu neen hanesan hare kulit, foos rai, batar, fore-mungu, fore-metan, fore-rai no koto.

CLN sosa rasik produtu lokál hanesan hare kulit ho presu kilograma 1/$0,40 no bainhira agrikultór lori rasik ba armazen $0,50, foos rai sosa direta hosi agrikultór $1 no agrikultór lori ba armazen $1,25, sosa direta batar hosi agrikutór $0,40 no lori rasik ba armazen $0,50.

Fomungu kada kilograma 1/$1,50 bainhira sosa direta no bainhira agrikultór lori ba armazen $2, fore-metan $1,20 no lori direta ba armazen $1,50, fore-rai kada $1.50 no lori direta ba armazen $2, koto $2 no lori rasik ba armazen $2,50.

Iha fatin hanesan, Agrikutór Uatulari, Julio Sakadura, husu CLN atu hasa’e presu produtu hodi motiva agrikultór sira.

“Tanba empreza sira mai sosa hare kulit kada kalen ida folin $12, maibé presu hosi CLN kilograma ida $0,40 to’o $0,50. Kompara ba hare kalen ida kilograma 12 hetan $4,8. Entaun ami sente bainhira fa’an kalen ida, ami manán liu kompara ba kustu ne’ebé Governu prevee. Tanba ne’e, ami husu Governu liuhosi CLN hasa’e presu oituan,” nia hato’o.

Antes ne’e, liuhosi fundu COVID-19 ba tinan ne’e, Governu prevee millaun $12 atu sosa produtu alimentár hosi produtór lokál atu apoia seguransa alimentár, ne’ebé to’o agora ezekusaun foin atinje $2.240.973 (19%) hosi totál alokadu.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here