Portavóz Partidu Libertasaun Populár (PLP), Francisco de Vasconcelos. Imajen Tatoli/egas Cristóvão.

DILI, 06 janeiru 2022 (TATOLI)—Prezidente Repúblika (PR), Francisco Guterres ‘Lú- Olo’ husu partidu polítiku hotu atu kontribui estabilidade iha eleisaun prezidenziál, tanba ne’e PR bolu PLP hanesan partidu polítiku ida informa kona-ba kalendáriu eleisaun antes dekreta ne’e konsulta no rona PLP nia opiniaun.

Notisia Relevante: PLP laiha kandidatura kompete iha eleisaun prezidensiál 2022

Porta Voz Partidu Libertasaun Populár (PLP), Francisco de Vasconcelos, hateten opiniaun esensiál PLP nian katak, kumpre de’it mandatu konstituisionál no lei eleisaun prezidensiál ne’ebé guia ema katak tenke hakruuk tuir lei labele liu loron 60, signifika ohin tenke prepara no semana oin mai PR dekreta ona kalendáriu eleisaun. 

Portavóz Partidu Libertasaun Populár (PLP), Francisco de Vasconcelos, hamutuk estrutura tomak hala’o enkontru ho Prezidente Repúblika, Francisco Guterres Lú Olo, hodi rona PLP nia hanoin kona-ba eleisaun prezidensiál. Imajen Tatoli/egas Cristóvão.

“Prezidente husu hanesan partidu polítiku kontribui tanba ita sei iha periódu ida COVID-19 pontu importante klaru tama iha kampaña halibur ema barak no partidu polítiku nia papél oinsá ko’alia ho sidadaun sira uza máskara. Prezidente Repúblika mós husu kandidatu se de’it mak kandidata an ita hotu apoiu no partidu polítiku nia kontribuisaun ba estabilidade, polítika no prosesu tomak tenke lao tuir regra sira ne’ebé iha lei eleisaun prezidensiál nian,’’ Francisco de Vasconcelos hateten ba jornalista hafoin hala’o enkontru ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pite, Dili, kinta ne’e.

Tuir nia, kampaña eleitorál ho modelu saida depende ba órgaun eleitorál define maibé kontribuisaun hosi partidu polítiku, tanba sei iha situasaun COVID-19 ho virus variante foun hanaran Omicron ida-ne’e sai hanesan preokupasaun ba parte hotu-hotu.

Kalendáriu eleisaun ne’e PR nak deside

Kona-ba kalendáriu eleisaun ne’e, nia hateten, konstituisaun no lei elisaun prezidensiál fó kompeténsia eskluzivu Prezidente Repúblika nain atu define antes loron 60 ne’e PR tenke dekreta ona kalendáriu eleisaun.

Notísia Relevante: Prezidente Repúblika rona PD nia hanoin kona-ba eleisaun prezidensiál

Hatán kona-ba PLP iha kandidatura PR atu kompete iha eleisaun prezidensiál ne’e, nia dehan, PLP seidauk iha hanoin PLP iha ninia kandidatura ba Prezidente Repúblika.

”PLP seidauk iha hanoin atu kandidatura PR iha ka la’e, tanba mekanizmu partidu nian sei iha enkontru alargada konferénsia no konfresista sira sei deside. Maibé se laiha mós sé de’it mak ba ita hotu ezerse ita-nia direitu síviku hodi hili atu lidera ita-nia nasaun iha tinan lima oin mai,” nia hateten.

Nia dehan, kona-ba plataforma partidu tolu ne’ebé daudaun iha Governu atu viaviliza oinsá Governu ne’e lori nia mandatu to’o rohan, maibé hanoin plataforma ne’e ba eleisaun prezidensiál seidauk ko’alia kona-ba ida-ne’e.

Tuir artigu 12 husi lei númeru 7/2006, 28 dezembru, ho alterasaun susesiva ba lei ne’e, Prezidente Repúblika tenke rona uluk Governu no partidu polítiku ho asentu iha Parlamentu Nasionál, molok dekreta data eleisaun ba Prezidente Repúblika.

Prezidente Repúblika sei rona partidu polítiku sira ho asentu iha Parlamentu Nasionál atu hatene sira-nia hanoin kona-ba data eleisaun prezidensiál ne’ebé sei akontese, pelu menus, loron 60 molok Prezidente atuál ramata ninia mandatu iha 20 maiu 2022.

Tuir ajenda, iha loron 07 janeiru, Xefe Estadu mós sei halo enkontru hodi rona partidu Partidu Unidade Dezenvolvimentu Demokrátiku (PUDD), Kongresu Nasionál ba Rekonstrusaun Timor-Leste (CNRT, siglá portugés), Kmanek Haburas Unidade Nasionál Timoroan (KHUNTO) no Uniaun Demokrátika Timorense (UDT).

Notísia Relevante: PR sei dekreta kalendáriu eleisaun hafoin rona partidu polítiku sira

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here