Prezidente Partidu Demokrátiku (PD), Mariano Sabino, ho nia estrutura hala’o enkontru ho Prezidente Repúblika (PR), Francisco Guterres ‘Lú- Olo’, hodi rona opiniaun molok Prezidente Repúblika dekreta kalendáriu eleisaun prezidensiál. Imajen Tatoli/Egas Cristóvão.

DILI, 06 janeiru 2022 (TATOLI)—Partidu Demokrátiku (PD), kinta ne’e hala’o enkontru ho Prezidente Repúblika (PR), Francisco Guterres ‘Lú- Olo’, hodi rona opiniaun molok Prezidente Repúblika dekreta kalendáriu eleisaun prezidensiál iha tinan ne’e.

Prezidente Partidu Demokrátiku (PD), Mariano Sabino. Imajen Tatoli/Egas Cristóvão.

“Ami-nia enkontru ohin ne’e kumpre de’it konstituisaun Prezidente Repúblika bainhira atu dekreta ba prosesu polítiku kalendáriu eleisaun prezidensiál 2022. Tuir konstituisaun rona mós partidu polítiku sira entaun ohin ami-nia diskusaun ko’alia loos de’it konsultasaun Prezidente nian,” Prezidente PD, Mariano Assanami Sabino, hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau, Bairru Pite, Dili.

PD nu’udar partidu demokrátiku ne’ebé iha responsavilidade boot atu instala valór demokrásia ba iha prosesu konstrusaun Estadu.

Nune’e, PD fó hanoin katak ita presiza kumpre konstituisaun no mantein valór demokrásia prátika ne’ebé iha tenke lao tuir dalan demokrásia no ukun ne’e povu nian, nune’e presiza fó tempu ba povu bele tuir eleisaun ho livre no regra hotu-hotu maske hasoru situsaun pandemia COVID-19.

“Maibé ita hakarak kumprimenta nafatin konstituisaun sei halo tuir prosesu hotu importante votu povu nian mak rezulta ba Prezidente Repúblika,” nia afirma.

Kona-ba kalendáriu eleisaun ne’e, nia dehan, kompeténsia Prezidente Repúblika nian mak sei dekreta no kumpre hodi hein.

Iha sorumutu ne’e, Xefe Estadu apresia pozisaun PD durante ne’e hanesan jerasaun foun ne’ebé mak ninia pertensia sentidu Estadu boot tebe-tebes.

Hafoin enkontru ramata, Prezidente Partidu Demokrátiku (PD), Mariano Sabino, ho nia estrutura hasai retratu hamutuk ho Prezidente Repúblika (PR), Francisco Guterres ‘Lú- Olo’. Imajen Tatoli/Egas Cristóvão.

Hatán kona-ba kandidatura PD nian atu kompete iha eleisaun prezidensiál 2022, nia dehan, bainhira PR dekreta ona kalendáriu mak PD sei halibur opiniaun hosi munisípiu hotu-hotu iha kandidatu rasik ka lae, sempre liu hosi komferénsia nivél nasionál ne’ebé hola parte mós hosi munisípiu.

“Kandidatura PD nian, iha ne’e kuadru PD nian maibé kandidatu tenke sai povu nian. Nu’udar jerasaun foun, ami sempre husu apoiu ba partidu no lidér hotu-hotu tanba Prezidente Repúblika ne’e diferensa ninia funsaun iha sistema semi-prezidensialista la’ós atu hala’o servisu partidu nian maibé garantia funsionamentu instituisionál no garantia sistema demokrátika ne’ebé la’o,” nia hateten.

Tuir artigu 12 husi lei númeru 7/2006, 28 dezembru, ho alterasaun susesiva ba lei ne’e, Prezidente Repúblika tenke rona uluk Governu no partidu polítiku ho asentu iha Parlamentu Nasionál, molok dekreta data eleisaun ba Prezidente Repúblika.

Prezidente Repúblika sei rona partidu polítiku sira ho asentu iha Parlamentu Nasionál atu hatene sira-nia hanoin kona-ba data eleisaun prezidensiál ne’ebé sei akontese, pelu menus, loron 60 molok Prezidente atuál ramata ninia mandatu iha 20 maiu 2022.

Antes halo enkontru ho líder partidu polítiku sira-nian, Prezidente Repúblika rona tiha ona  Governu, liuhosi Primeiru-Ministru, Matan Ruak no Ministru Administrasaun Estatal Miguel Carvalho.

Prezidente Repúblika rona mós Komisaun Nasionál Elisaun (CNE) no Sekretariadu Tékniku Administrasaun Eleitorál (STAE) kona-ba preparativu ba eleisaun prezidensiál 2022.

Tuir ajenda, kinta ne’e, iha tuku 08h30 Prezidente Repúblika hala’o ona enkontru ho lidér Partidu Demokrátiku hanesan Prezidente PD, Mariano sabino, akompaña mós estrutura PD hanesan Nivio Mangalhães ho sira seluk.

Iha tuku 09h45 enkontru ho lidér Partidu Libertasaun Popular (PLP), iha tuku 10h45 ho partidu Frente Mudansa (FM), tuku 11h45 ho Partidu Frente Revolsionáriu Indepedente (Fretilin).

Tuir ajenda, iha loron 07 janeiru, Xefe Estadu mós sei halo enkontru hodi rona partidu Partidu Unidade Dezenvolvimentu Demokrátiku (PUDD), Kongresu Nasionál ba Rekonstrusaun Timor-Leste (CNRT, siglá portugés), Kmanek Haburas Unidade Nasionál Timoroan (KHUNTO) no Uniaun Demokrátika Timorense (UDT).

Notísia Relevante: PR sei dekreta kalendáriu eleisaun hafoin rona partidu polítiku sira

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here