Prezidente Repúblika, Francisco Guterres 'Lú-Olo'. Imajen Tatoli/Antonio Gonçalves.

DILI, 05 janeiru 2022 (TATOLI)—Tuir artigu 12 hosi Lei númeru 7/2006, 28 dezembru, ho alterasaun susesiva ba Lei ne’e, Prezidente Repúblika tenke rona uluk Governu no partidu polítiku ho asentu iha Parlamentu Nasionál, molok dekreta kalendáriu eleisaun ba Prezidente Repúblika.

Notísia Relevante: Prezidente Repúblika sei dekreta kalendáriu eleisaun prezidensiál iha janeiru 2022

Iha 6-7 janeiru 2022, Prezidente Repúblika sei rona partidu polítiku sira ho asentu iha Parlamentu Nasionál atu hatene sira-nia hanoin kona-ba data eleisaun prezidensiál ne’ebé sei akontese, pelu menus, loron neen nulu (60) molok prezidente atuál ramata ninia mandatu iha 20 maiu 2022.  

“Tuir ajenda, iha loron 6 janeiru, Prezidente Repúblika, Francisco Guterres Lú Olo sei hala’o enkontru ho Partido Democrático (PD), Partido da Libertação Popular (PLP), Frente Mudança (FM), Frente Revolucionária de Timor-Leste Independente (FRETILIN). Iha loron tuir kedas, 7 janeiru, sei hala’o reuniaun ho Partidu Unidade Dezenvolvimentu Demokrátiku (PUDD), Congresso Nacional para a Reconstrução de Timor-Leste (CNRT), Kmanek Haburas Unidade Nasional Timoroan (KHUNTO) no União Democrática Timorense (UDT),” refere komunikadu imprensa ne’ebé Agência Tatoli asesu, kuarta ne’e.

Molok halo enkontru ho líder partidu polítiku sira-nian, Prezidente Repúblika rona tiha ona  Governu, liu-hosi Primeiru-Ministru, Taur Matan Ruak no Ministru Administrasaun Estatál Miguel Carvalho.

Prezidente Repúblika rona mós Comissão Nacional de Eleições (CNE) no Secretariado Técnico de Administração Eleitoral (STAE) kona-ba preparativu ba eleisaun prezidensiál 2022.

Ba eleisaun prezidensiál tinan ne’e, númeru sentru votasaun no estasaun votu sei aumenta iha territóriu Timor-Leste tomak.

Notísia Relevante: Governu aprezenta kalendáriu tentativa realiza eleisaun prezidensiál iha 18 marsu

Iha eleisaun antesipada 2018, estabelese sentru votasaun 885 maibé iha eleisaun prezidensiál 2022 ne’e sei aumenta sentru votasaun hamutuk 1200, no númeru estasaun votu sei aumenta hosi 1260 (iha 2018) ba 1500 iha tinan 2022.

Hasa’e númeru sentru votasaun no estasaun votu permite hakbesik liután fatin votasaun ba eleitór sira,  nune’e maioria ho otas 17 ka liu, ne’ebé rejista iha STAE, bele ezerse sira-nia direitu atu hili Prezidente Repúblika ba mandatu 2022-2027, nune’e taxa partisipasaun eleitór sei sa’e iha eleisaun tuir mai.

Ho númeru sentru no estasaun barak liu, númeru votante iha fatin ida-idak sei menus tanba buka hamenus númeru eleitór halibur iha fatin ida, Governu Timor-Leste foti medida di’ak ida atu proteje mós timor-oan hosi moras COVID-19 nian, ne’ebé sei la’o nafatin iha mundu ho variante oioin.

Notísia Relevante: PR dekreta kalendáriu eleisaun, kandidatu bele aprezenta kandidatura ba TR

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here