Prezidente Konsellu Veteranu, Vidal de Jesus Riak Leman. Imajen Tatoli/dok

DILI, 18 agostu 2021 (TATOLI)—Ekipa verifikasaun nasionál hamutuk grupu tolu (3), segunda (16/08) ne’e dezloka ona ba munisípiu sira iha territóriu nasionál atu halo verifikasaun ba dadus veterenu ne’ebé rejistadu iha 2009.

Prezidente Konsellu Veteranu, Vidal de Jesus “Reak Leman”, hateten iha fatin balun prosesu verifikasaun ne’e la’o di’ak no balun la’o ladún di’ak ka lentu tanba veteranu sira mak esplika sira-nia partispasaun durante iha funu laran.

Notísia Relevante: MAKLN prepara ekipa re-verifika dadus veteranu rejistadu iha 2009

“Horisehik mak ami foin tama iha suku Dato rua, Postu Administrativu Suai, Munisípiu Covalima halo monitorizasaun ba verifikasaun dadus veteranu ne’ebé rejista iha 2009. Iha prosesu verifikasaun ne’ebé ami observa ne’e la’o di’ak,” Reak Leman hatete ba Agéncia TATOLI, via telefónika, kuarta ne’e.

Reak Leman hateten, daudaun ne’e ekipa ida kontinua halo hela monitorizasaun iha Munisípiu Manufahi parte Fatuberliu, Welaluhu nian no ekipa seluk hala’o servisu iha munisípiu sira seluk.

“Ami hosi nasionál ne’e mak fahe ba ekipa tolu. Ha’u-nia ekipa mak kobre iha munisípiu Aileu, Ainaro, Suai ho Same. Ekipa daruak Vise Prezidente Konsellu Veteranu, Marito Reis mak lidera no kobre iha Liquiça, Ermera, Bobonaro no Rejiaun Administrativa Espesiál Oé-Cuse Ambeno (RAEOA) inklui Dili. Ekipa seluk mak Brigadeiru Aluc mak toma konta ba Munisípiu Baucau, Manatuto, Lautem no Viqueque,” nia hateten.

Nia dehan, objetivu hosi monitorizasaun ne’e atu hatene prosesu verifikasaun iha kada suku tanba liuhosi verifikasaun mak bele hatene iha prosesu ne’e iha difikuldade ka oinsá, maibé ekipa observa buat hotu la’o di’ak.

Notísia Relevante: Aban, ekipa sei dezloka ba munisípiu verifika veteranu nia dadus

Jornalista : Osória Marques

Editór        : Cancio Ximenes

HAKEREK NO HATÁN

Please enter your comment!
Please enter your name here