Ministru Asuntu Kombatente Libertasaun Nasionál, Julio Sarmento da Costa ‘Meta Mali’. Imajen TATOLI/Egas Cristóvão

DILI,25 fevereiru 2021 (TATOLI)—Ministériu Asuntu Kombatente no Libertasaun Nasionál (MAKLN) prepara ona ekipa atu re-verifika dadus veteranu sira ne’ebé rejistu iha tinan 2009, hafoin prosesa hodi halo pagamentu.

Tuir dadus hosi MAKLN no Komisaun Omenajen, veteranu ne’ebé rejistu iha 2009 hamutuk 100.000-resin.

“Dadus veteranu sira ne’ebé rejistu iha tinan 2009, foin verifika 14.000 hosi totál 100.020 tanba orsamentu laiha, tanba ne’e iha tinan ne’e ita prevee ona orsamentu atu kontinua halo verifikasaun,” Ministru Asuntu Kombatente Libertasaun Nasionál, Julio Sarmento da Costa ‘Meta Malik’, informa iha Palásiu Governu, kinta ne’e.

Governante ne’e dehan, daudaun ekipa prepradu atu tuun terrenu halo verifikasaun ba dadus, ne’ebé ekipa sira sei la fó fatin ba ema ne’ebé falsifika dokumentu hodi benefisia osan Estadu.

“Ita iha ona esperiénsia katak rejistu uluk ne’e iha veteranu falsu, tanba planu veteranu sei hatama ba fundu kuaze millaun $10. Tanba hafoin ekipa ba terrenu no hasai foto inklui identidade, identifika iha veteranu falsu mak asesu osan Estadu,” nia akresenta.

Ministru esplika, lei la fó dalan ba primu, subriñu ka bei-oan inklui alin ka maun uma lisan ida atu rejistu fali mártir ida nu’udar benefisiáriu, maibé autoriza de’it inan ho aman rasik, inklui maun alin no feen.

“Ami-nia ekipa verifikasaun mós la fó dalan ba sé de’it mak hakarak falsifika dokumentu, maski serbisu ne’e la’ós fasil,” nia hatutan.

Bainhira MAKLN deteta ema balun falsifika dokumentu, sei hapara asesu osan veteranu.

Iha biban ne’e, governante ne’e husu sidadaun ne’ebé deteta ema balun falsifika dokumentu, presiza halo keixa ba parte kompetente atu prosesa tuir lei.

“Ami enkoraja viziñu sira ne’ebé besik no hatene malu, atu halo keixa tanba la’ós ministériu no sekretáriu Estadu de’it mak bele buka, maibé bainhira sé de’it identifika bele hato’o keixa,” nia fó hanoin.

Biban hanesan, Prezidente Konsellu Kombatete Libertasaun Nasionál (KKLN), Vidal de Jesus ‘Riak Leman’, konsidera presiza halo verifikasaun rigorozu.

“Ema ne’ebé verifika dokumentu tenke independente, nune’e bele halo serbisu ho di’ak,” nia dehan.

Jornalista: Florêncio Miranda Ximenes

Editora: Julia Chatarina

3 KOMENTÁRIU

  1. Obigado ba informasaun, Iha ne hw so atu hato’o dt katak c bnhira martires nebe la iha ona nia inan aman no nia bin ka maun alin nb sei iha mybe sra hotu inklui iha parte beteranu oinsa sra ble resistu nia familia martir nia direitu banhira lable duplikat, apakah hakarak halakon total dt martires nia naran.
    Ami nia familia barak mate iha fatin ida Laos tamba hamlaha mybe tamba kilat musan, nb ita estadu tenke konfere ho lolos apakah ema nb resistu martir nia naran ne Laos nia gerasau.
    Mate tamba moras bele hetan nia direitu, mybe mate iha funu laran ho kilat musan hakarak halakon nia direitu bnhira nia inan aman maun alin rasik la iha, ida ne tenke tetu didiak tmb ema nb resistu martir ne Laos ema fuik let mybe nia jerasaun.Obrigado

  2. Persija duni buka tuir veteranus Falsu
    Tamba dala barak mak interese familiar hodi falsifikasaun dukumentos falsu.
    Barak mak 1975 la kaer kilat to mai 1999 laiha kontribuisaun osan no Aihan ba falintil ikus sira maka goja osan iha estado ida ne.
    Iha balun dala barak Halao fulan 1 bele hetan osan Beteranus 8a14.

  3. Los duni,se ita la verifika lolos maka veteranos falsu mak impede fali ema seluk nia diretu,enquntu ema barak hein hela ninia direitu ne’ebe luta naruk ida ne dalaruma hein to ema ne mate tiha.Ita prezisa duni atu fo hanoin ba nai ulun sira liliu Ministeriu do Kompatentes Nasional atu buka tuir nia ema sira nebe uluk hahu husi 1975 to’o 1999 nebe fo nia didikasaun tomak ba nasaun ida ne’e,laos ema ne’ebe uluk fo nia votu ba otonomia mak hetan Diretu fali ne ladiak Obrigado

HAKEREK NO HATÁN

Please enter your comment!
Please enter your name here