DILI,04 janeiru 2022 (TATOLI)— Tuir dadus estátistika hahú hosi fulan janeiru to’o dezembru 2021, Servisu Saúde Munisípiu Dili (SSMD), rejista ema ne’ebé afetadu moras dengue hamutuk 672, hosi númeru ne’e, na’in-ualu mak mate.
“Kazu dengue hosi janeiru too dezmebru 2021 ne’ebé mak ami rejista hamutuk 672 no mate na’in ualu. Agora ita tama ona ba tinan 2022 semana dahuluk fulan janeiru nian ita rejista ona pasiente ba kazu dengue hamutuk na’in haat mai husi postu adminsitrativu Dom Aleixo nian,’’ Diretora Servisu Saúde Munisípiu Dili, Agostinha Segurado, informa ba jornalista sira iha Pálasiu Sinzas, Caicoli, tersa ne’e.
Notìsia relevante: Kombate dengue presija konsiénsia komún
Ho kazu ne’e, SSMD halo ona intervensaun no preparasaun liuliu atu halo distribuisaun ai-moruk ba bairru sira atu rega susuk. Maski intervesaun atrazu tebes, nune’e komunidade kestiona.
“Loos duni ita atrazu tebes halo intervensaun liuliu distribuisaun aimoruk rega susuk nian tanba sei iha prosesu aprovizionamentu ba akizasaun, maibé, ita kontinua halo edukasaun saúde atu komunidade prevene an hosi dengue,’’ Diretora ne’e akresenta.
Daudaun ne’e, SSMD ho Diresaun Saúde Pùblika empresta stock ai-moruk abate hosi Postu Saùde Munisìpiu Liquiça, Aileu no Ermera hamutuk box lima atu distribui ba bairru risku dengue munisípiu Dili.
Tanba, nia dehan ho aimoruk box lima ne’e la sufisiente tanba númeru populasaun ka uma-kain iha Dili barak liu, maibè stock aimoruk laiha.
“Ha’u husu ba komunidade atu kontribui atu hamoos lixu no labele so’e foer arbiru no husu ba autoridade lokàl sira atu mobiliza komunidade halo limpeza bairru sira no uma-laran,’’ Diretora ne’e rekomenda.
SSMD indetifika iha munisípiu Dili ne’e área risku ba dengue mak postu administrativu Dom Aleixo, Cristo Rei, Na’in- Feto no Vera Cruz.
Notìsia relevante: Dengue hamate ema na’in-rua iha HNGV
Jornalista : Felicidade Ximenes
Editòr : Florencio Miranda Ximenes
