Ilustrasaun Dengue. Imajen/Espesiál

DILI, 03 janeiru 2022 (TATOLI)— Xefe Gabinete Kontrolu Kualidade no Komunikasaun Sosiál, Hospitál Nasionál Guido Valadares (HNGV), Sara Maria Xavier, informa, durante Natál 2021 no Tinan Foun 2022, rejista ema na’in rua-mate tanba kauza moras dengue.

“Iha selebrasaun loron boot, ami rejista labarik feto ida ho tinan 10, hosi Ailok-Laran-Dili mate ho dengue tanba mai iha ne’e ho kondisaun grave, ne’ebé to’o iha emerjénsia HNGV mate ona. No inan feto ida mate tanba moras dengue hemorragica ne’e, iha loron 01 janeiru 2022, ho idade 75 hosi munisípiu Ermera tanba grave hotu,’’ Xefe Gabiente ne’e, hateten, ba jornalista sira iha HNGV-Bidau, segunda ne’e.

Kona-ba totál moras dengue, seidauk bele fó sai tanba sei halo akumulasaun hafoin públika iha semana oin.

Nune’e, nia hakarak fó hanoin ba komunidade sira atu kontinua halo prevensaun ba moras dengue, diareia no ISPA liuhosi hamoos uma laran liuliu lixu.

“Ita-nia uma hun mak bee nalihun karik hamoos tanba ida ne’e kria susuk hanesan kalen at sira hakoi, vazu ai-funan sira tenke hamoos, atu nune’e labele kria susuk barak no susuk labele moris ba,” Xefe Gabinete ne’e fó hanoin.

Nia mós husu ba inan-aman tenke kontrola oan-sira bainhira atu han ka hemu presiza fase liman, atu prepara ai-han ruma mós tenke fase liman no presiza mós prepara ai-han ho di’ak,  seguru no saudavél.

“Ha’u husu ba inan-aman sira bainhira labarik hatudu ona sinál sintoma ruma labele kleur iha uma, maibé tenke ba lalais fasilidade saúde ne’ebé mak besik hodi  hetan atendimentu husi  médiku sira,” nia husu.

HNGV rejista pasiente 188

Nia hatutan, durante loron boot Natál no tinan foun, Departamentu Emerjénsia rejista kazu hamutuk 118, hosi númeru ne’e óbitu na’in-tolu.

“Iha loron 1 janeiru 2022   totál pasiente triajen iha sala emerjénsia hamutuk 118, kompostu hosi kazu ema taa malu no moras sira seluk, nune’e mós asidente trafégu na’i- ulau no pasiente ne’ebé mak mate na’in tolu, hanesan ida mate ho moras tumor iha kakutak, ida seluk mate ho pneumonia no ida seluk mate ho dengue,’’ Xefe Gabiente ne’e akresenta.

Nune’e, iha loron 31 dezembru 2021, rejista iha triajen emerjénsia hamutuk 168, kompostu ema ne’ebé hetan pankada na’in-lima, asidente tráfegu na’in-12, hosi númeru ne’e laiha óbitu.

Alende ne’e, iha sala maternidade liuliu bebé moris iha loron 24 dezembru 2021 hamutuk na’in-11, kompostu na’in-haat mak partu normál no na’in-hitu partu ho operasaun. No iha loron 25 dezembru, bebé ne’ebé moris hamutuk na’in-14   hanesan partu normál hamutuk 11 no partu ho operasaun na’in-tolu.

Enkuantu iha loron 31 dezembru bebé ne’ebé moris hamutuk 13 hosi ne’e partu normál 10 no partu ho operasaun na’in-tolu no iha loron 01 janeiru 2022 bebé moris na’in-12 hosi ne’e partu normál na’in-ulau no partu operasaun na’in-haat.

“Durante loron boot selebra Natál no tinan foun laiha inan ho bebé mak mate iha HNGV, maibe sira-nia kondisaun di’ak hotu no sira alta ba uma,’’ Xefe gabinete ne’e informa.

Notísia Relevante: Durante selebrasaun Natál, HNGV rejista pasiente 155 no óbitu nain-rua

Jornalista : Felicidade Ximenes

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here