Vise-Ministru ba Dezenvolvimentu Estratéjiku Saúde, Bonifácio Maukoli dos Reis. Imajen Tatoli/Egas Cristovão.

DILI, 25 fevereiru 2021 (TATOLI)—Vise-Ministru Saúde, Bonifácio ‘Mau Coli’ dos Reis, husu ema hotu-hotu atu ho konsiénsia kontribui ba prevensaun dengue, ne’ebé oras ne’e invade populasaun Timor-Leste (TL).

Bonifácio ‘Mau Coli dos Reis fó sai apelu ne’e liuhosi entrevista ho jornalista Agência Tatoli iha Sentru Saúde Comoro, kinta ne’e.

Notísia Relevante:Janeiru-favereiru, MS rejista kazu dengue 337 no ida mate

“Fulan-rua de’it dengue sa’e makaas. Entaun, hosi ne’e presiza envolvimentu  ema hotu-hotu nian. Ita iha hela surtu COVID-19, maibé iha tempu udan susuk mós barak no bee nalihun, lata sira so’e arbiru, ida-ne’e mak hamosu dengue. Tanba ne’e husu atu hamoos idaidak-nia fatin,’’ Governante ne’e apela.

Nia husu ba família hotu-hotu atu hamoos beibeik uma laran, labele tara roupa iha fatin-fatin tanba hosi susuk ne’ebé tata sei hamosu dengue.

Oras ne’e daudaun, parte Ministériu Saúde mós orienta nafatin pesoál  saúde-sira atu halo fomigasaun no fahe abati ba fatin riksu-sira ne’ebé  dengue barak, nune’e bele hamate susuk.

Dadus moras dengue ne’ebé antes ne’e fó-sai hosi Diresaun Nasionál Kontrola Moras, Ministériu Saúde, fulan janeiru to’o loron 20 fevereiru 2021 hamutuk 337 no na’in ida mate.

Númeru ne’e hatudu katak, Dili aas-liu hamutuk  204 (60.5%), Baucau 56 (16.6%), Bobonaro 23 (6.8%), Ermera 13 (3.9%).

Tuir-mai, Munisípiu Manatuto 10 (3.0%), Manufahi na’in-ualu  (2.4%) Mate na’in-ida, Covalima na’in-ulau  (2.4%), Ainaro na’in-hitu  (2.1%), Liquiça no Lautem na’in haat  (1.2%).

Notísia Relevante:Papél autoridade lokál importante ba prevensaun dengue iha Dili

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here