Komunidade Comoro-Dili, troka voucher Cesta Bázika iha supermerkadu Leader, kinta (10/12/20). Imajen TATOLI/António Gonçalves

LIQUIÇÁ, 30 dezembru 2021 (TATOLI)–Governu liuhosi Ministériu implementadór sira, kinta ne’e, ofisialmente halo enserramentu distribuisaun nasionál ba programa Cesta Bázika, ne’ebé antes ne’e lansa iha Metinaro, iha outubru 2020.

“Ohin Ministériu Koordenadór Asuntu Ekonómiku (MKAE) hamutuk ho entidade implementadór sira, enserra programa Cesta Bázika, ne’ebé ita distribui ona ba timor-oan hotu hamutuk 1.491.661 kabaze, iha aldeia 2.234 hosi suku 452,” Ministru Koordenadór Asuntu Ekonómiku, Joaquin Amaral, hateten, liuhosi konferénsia imprensa, iha Sentru Formasaun Tibar, kinta ne’e.

Notísia relevante: Governu ofisialmente halo lansamentu nasionál programa Cesta Bázika

Nune’e, Ministru dehan, ba oin sei laiha tan distribuisaun ba reklamante, tanba programa Cesta Bázika realiza ona durante fulan-14, ne’ebé períodu ne’e inklui ona rezolve reklamasaun iha fulan-haat ikus.

“Reklamante ne’ebé la simu no lakon direitu, tanba lei hateten reklamante iha períodu halo reklamasaun no lei la hateten reklamasaun indeterminadu tempu. Reklmante antes ne’e 50.000, maibé iha duplikasaun lubuk ida ne’ebé sistema konsege halo croos check no númeru ne’ebé apuradu ne’e 25.000 mak simu ona direitu,” nia akresenta.

Iha fatin hanesan, Ministru Turizmu Komérsiu no Industria, José Lucas do Carmo da Silva, hateten, hanesan implementadór programa Cesta Bázika sente orgullu tanba ikus mai bele atinje progresu di’ak no susesu.

Ba faze dahuluk, fundu ne’ebé aloka mai MTKI $34.291.900 no ninia ezekuasaun ba faze dahuluk $31.727.143.

Totál kabaze ka kobertura ne’ebé MTKI distribui hamutuk 614.198 ka 93%, nune’e iha faze daruak ministériu ne’e hetan mós fiar hosi MKAE atu envolve ba faze daruak ninian, ba kompozisaun reklamasaun.

Notísia relevante: MTKI distribui ona Cesta bázika iha suku Cassa

“Nune’e, iha faze daruak ne’e ita simu pedidu hosi MKAE ho númeru reklamasaun hamutuk 25.000 ho orsamentu $1.250.000, ida-ne’e faze finalizasaun hotu ona no pagamentu mós halo ona, ne’ebé relatóriu mós submete ona ba ministériu koordenadór,” nia dehan.

Iha faze daruak, MTKI simu pedidu hosi MKAE halo distribuisaun ba aldeia Mausuka, suku Cassa ho benefisiáriu hamutuk 766.

Envolve empreza 218

Empreza nasionál ne’ebé durante ne’e apoiu Governu implmenta Cesta Bázika hamutuk 218.

“Hosi empreza sira ne’e, ita halo ona pagamentu tanba ita hatene loron 30 to’o 31 dezembru 2021 sistema pagamentu taka hotu ona, ne’ebé sira hotu hetan ona direitu,” Ministru informa.

Bazeia ba dekretu-lei númeru 48/2020, 07 outubru, kona-ba medida apoiu família, atribuisaun Cesta Bázika, operadór ekonómika lokál iha ámbitu planu rekuperasaun ekonómika no kria rejime espesiál aprovizionamentu ba efeitu, iha artigu 10 kona-ba modalidade aprovizionamentu, temi katak aprovizionametu ba akizisaun produtu Cesta Bázika realiza bazeia ba modalidade ajudikasaun direta to’o limite verba ne’ebé aloka ba entidade ajudikante ne’ebé ministériu indika ona.

Bazeia ba artigu 9 dekretu-lei ne’e, kona-ba akizisaun produtu no embalajen produtu bazeia ba distribuisaun Cesta Bázika obdese ba rejime jurídiku aprovizionamentu no kontratu públiku, independente, ho valór ne’ebé korrespondente.

Enkuantu aprovizionamentu sei realiza hosi Gabinete MAKE inklui ministériu implementadór programa hanesan MTKI), Ministériu Agrikultura no Peska (MAP), Sekretaria Estadu Kooperativa (SEKoop), Sekretaria Estadu Ambiente (SEA) inklui Autoridade Rejiaun Administrativa Espesiál Oé-cusse Ambeno (RAEOA).

Governu fó konfiansa ba setór privadu atu asume resposabilidade no garante katak sasán ba benefisiáriu korrespondente ho montante ka osan ne’ebé temi.

Tanba ne’e, ministériu implementadór kontinua husu ba instituisaun sira hanesan Provedoria Direitu Umanu no Justisa (PDHJ, sigla portugés), Komisaun Antí-Korrupsaun (CAC, sigla portugés) no Organizasaun Naun Governamentál (ONG) inklui populasaun tomak atu ajuda kontrola no tau matan ba programa atu susesu.

Tuir diploma ministeriál konjuntu númeru 38/2020, 26 outubru, produtu ne’ebé tama lista programa Cesta Bázika maka, produtu alimentár, kompostu husi foos, batar, kote/fore, amendoim, sorgum dulas, kafé, masin, fehuk ropa, susu ben, masin midar, manu, manu tolun, mina tein, mina-nuu, trigu, inklui modo sira hanesan ervilla, tomate, koto nurak, fore sikote, repollu, kouve, modo metan, modo mutin no modo seluk tan.

Enkuantu ba produtu ijiene maka, sabaun, álkool jel, deterjente, eskova nehan no pasta nehan.

Programa Cesta Bázika fixa membru idaidak agregadu familiár sei hetan $25, kada fulan iha fulan-rua nia laran ($50) no bele troka ho folin sasán ne’ebé korresponde ba valór osan.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here