Produtu Cesta Bázika. Imajen Tatoli/Antónia Gusmão

METINARO, 27 outubru 2010 (TATOLI)—VIII Governu Konstitusionál liuhosi Ministériu Turizmu, Komérsiu no Indústria (MTKI), ofisialmente halo lansamentu nasionál ba programa Cesta Bázika iha ámbitu rekuperasaun ekonómika ba kurtu prazu. 

Ministru Turizmu, Komérsiu no Indústria, José Lucas do Carmo da Silva, hateten programa ne’e hanesan kontinuasaun programa Governu.

Produtu Cesta Bázika. Imajen Tatoli/Antónia Gusmão

“Atividade ne’e kontinuasaun programa sira ne’ebé antes ne’e Governu implementa ona iha ámbitu rekuperasaun ekonómika,” Ministru tenik iha ámbitu lansamentu nasionál, iha suku Sabuli, postu administrativu Metinaro, munisípiu Dili, tersa ne’e.

Notísia Relevante: Distribuisaun Cesta Bázika ba munisípiu ho embalajen, Dili uza voucher

Lansamentu ne’e hosi Vise Primeiru-Ministru no Ministru Planu no Ordenamentu, José Maria dos Reis no Ministru Turizmu, Komérsiu no Industria, José do Carmo da Silva, membru Governu balun, autoridade lokál Metinaro, parseiru dezenvolvimentu, setór privadu, inklui komunidade.

Iha fatin hanesan, Administradór postu administrativu Metinaro, Fausto Soares Dias, apresia inisiativa Governu tanba bele hili ona Metinaro hanesan fatin lansamentu ba programa ne’e. 

“Agradese tebes ba Governu ne’ebé mak esforsu maka’as hodi ikus mai bele implementa programa ne’e,” Autoridade postu ne’e dehan.

Vise Primeiru-Ministru no Ministru Planu no Ordenamentu, José Maria dos Reis, entrega produtu Cesta Bázika simbolikamente ba komunidade. Imajen Tatoli/Antónia Gusmão

Totál populasaun iha Metinaro hamutuk 764.000 maka sei benefisia programa Cesta Bázika.

Programa Cesta Bázika fixa membru idaidak agregadu familiár sei hetan $25, kada fulan iha fulan-rua nia laran no bele troka ho folin sasán ne’ebé korresponde ba valór osan.

Governu sei implementa medida haat ho kustu totál millaun $113,4, ba kurtu prazu hanaran mitigasaun impaktu ekonómiku no sosiál ba krize COVID-19, ho objetivu esensiál atu haree ba postu traballu ezistente antes krize no rekupera rendimentu família liuhosi hadi’a empregu no apoiu direitu sidadaun no empreza iha merkadu inklui normaliza hikas atividade ekonómika.

Hosi medida haat ne’e, inklui hotu ho Cesta Bázika ba família, ho totál kustu ba implementasaun hamutuk millaun $71,5 (valór bele iha mudansa) ho objetivu atu fó apoiu ba nesesidade bázika família, kombate hamlaha ba família vulnerável liu, apoiu ba agrikultór, produtór no komersiante lokál.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here