Ministru Turizmu Komérsiu no Indústria, Lucas do Carmo da Silva, fahe Cesta Bázika ba komunidade iha suku Casa. Imajen/MTKI

DILI, 20 dezembru 2021 (TATOLI)–Ministru Turizmu Komérsiu no Indústria (MTKI), Lucas do Carmo da Silva, iha sábadu (18/12) ne’e, halo distribuisaun produtu Cesta Bázika iha aldeia Mausuka, suku Cassa, postu administrativu Ainaro villa, munisípiu Ainaro.

Iha seremónia ne’e, Ministru José Lucas, apresia komunidade iha aldeia Mausuka tanba bele hein ho pasiénsia no ohin bele simu distribuisaun produtu iha faze ikus.

“Programa ne’e povu nian, ema hotu direitu ba Cesta Bázika. Ho ida-ne’e ha’u husu ba komunidade atu simu distribuisaun ne’e ho didi’ak tanba ne’e ita-boot sira-nia direitu ne’ebé simu ba, tanba ne’e mak ba dala ikus ona iha tinan-2021 nian,” Ministru hateten liuhosi nota ne’ebé Agência TATOLI asesu, segunda ne’e.

Iha biban hanesan, Xefe suku Casa, Longuinhos de Araújo, hateten, iha fulan hirak liubá komunidade aldeia Mausuka seidauk hetan distribuisaun Cesta Bázika tanba sira la satisfáz ho folin sasán ne’ebé mak oferese hosi empreza ne’ebé sai responsável ba asuntu ne’e.

“Ho ida-ne’e lori hau-nia komunidade nia naran, hato’o agradese no sente kontente tanba simu to’o ikus hau-nia komunidade bele simu sira-nia direitu,” nia hateten.

Notísia relevante: Uma-kain 167 iha suku Cassa Ainaro rejeita simu Cesta Bázika

Entretantu, benefisiáriu ne’ebé hetan distribuisaun Cesta Bázika hamutuk na’in-766 hosi uma-kain 169.

Tuir diploma ministeriál konjuntu númeru 38/2020, 26 outubru, produtu ne’ebé tama lista programa Cesta Bázika maka, produtu alimentár, kompostu husi foos, batar, kote/fore, amendoim, sorgum dulas, kafé, masin, fehuk ropa, susu ben, masin midar, manu, manu tolun, mina tein, mina-nuu, trigu, inklui modo sira hanesan ervilla, tomate, koto nurak, fore sikote, repollu, kouve, modo metan, modo mutin no modo seluk tan.

Enkuantu ba produtu ijiene maka, sabaun, álkool jel, deterjente, eskova nehan no pasta nehan.

Programa Cesta Bázika fixa membru agregadu familiár sei hetan $25, kada fulan iha fulan-rua ($50) nia laran, ne’ebé troka ho folin sasán ne’ebé korresponde ba valór osan.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here