Ekipa Karketu Dili FC. Imajen/Mídia LFA

DILI, 21 dezembru 2021 (TATOLI)– Ekipa kapitál Karketu Dili FC no Ponta Leste hahú prontu iha fíziku no tékniku atu kompete iha jogu primeira divizaun Liga Futeból Timor-Leste (LFTL), ne’ebé sei realiza, ohin, lokraik, tuku 16:00 iha Estádiu Munisipál Dili.

Sekretáriu Jerál Karketu Dili FC, Elizeu Isaac, konsidera jogu ne’e importante ba sira hodi deside destiñu ba kampiaun.

“Jogu, ohin, ne’e importante tebes ba ami. Ami la hakfodak ba Ponta Leste  tanba  la’ós ekipa forte mai ami no  ami konsidera sira ekipa bainbain mai ami ne’ebé kampiaun iha ona ami nia-liman,” Sekretáriu Jerál ne’e afirma ba Agência TATOLI iha Audian Dili, tersa ne’e.

Notísia Relevante: Karketu “mehi” sai kampiaun iha jogu primeira divizaun

Nune’e, nia dehan jogadór Karketu nian preparadu iha tékniku no fíziku atu hatudu jogu ne’ebé bonitu hodi manán Ponta Leste.

“Ami sei hatudu jogu ne’ebé oin-seluk hanesan jogu sira liu ona ne’e. Ami sei la lakon iha jogu ida ne’e,” nia garante.

Ekipa AS Ponta Leste. Imajen Mídia LFA

Iha sorin seluk, Asistente Treinadór Ponta Leste, Van Basten, mós konsidera Karketu la’ós ekipa forte ba sira.

“Ba ami Karketu la’ós ekipa forte, ami sei manán sira iha jogu hanesan ami manán Lalenok ho DIT iha jogu ne’e. Ami sei impede karketu ba kampiaun,” nia akresenta.

Iha tabela klasifikasaun provinzóriu Karketu mak lidera ho pontu 11, tuir kedan Lalenok United FC ho pontu 10, Ponta Leste pontu ualu, SLB pontu hitu, Assalam pontu lima, Aitana pontu haat no DIT mak ikus liu ho pontu 3.
Hosi pontu hirak ne’e no jogu hela jornada ida ba ekipa hitu ne’e, nune’e Karketu ho Lalenok mak kandidatu forte ba kampiaun.

Nune’e, Karketu iha nia jornada ikus kontra Ponta Leste no tenke manán, hafoin hetan titulu kampiaun, maibé lakon no empate sei laiha direitu ba kampiaun. Enkuantu Lalenok jogu ikus kontra DIT FC nia tenke manán hafoin sai kampiaun no nia empate ou lakon sei la sai kampiaun.

Kona-ba ekipa lima seluk laiha ona oportunidade ba kampiaun tanba pontu la to’o ona ho ekipa rua ne’e.

Notísia Relevante: Ponta Leste manán DIT FC 1-0

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here