Kontra no atake entre Ponta Leste (kamizola mean) no DIT FC (faru mutin). Imajen/média LFTL.

DILI, 19 novembru 2021 (TATOLI)- Ekipa AS Ponta Leste susesu iha nia jornada hodi manán nia adversáriu DIT FC ho skore 1-0 iha jogu kontinuasaun Liga Futeból Timor-Leste (LFTL) ne’ebé hala’o iha Estádiu Munisipál Dili, sesta loraik ne’e.

Hosi vitória ne’ebé Ponta Leste konkista lori ekipa ne’e tuur iha tabela klasifikasaun provizóriu iha liña terseiru ho pontu tolu, enkuantu segundu okupa hosi Karketu ho pontu tolu no primeiru okupa hosi Lalenok ho pontu tolu. Pontu hanesan maibé diferensa iha bola halo ekipa tolu ne’e tuur la hanesan.

Bainhira minutu primeiru hahú ekipa rua ho ambisaun ne’ebé makas liuhosi lansa bola hosi ain ba ain atu buka hatama golu tuir tékniku no abilidade ekipa idaidak nian.

Hosi minutu primeiru too minutu 10-resin kontra no atake hosi ekipa rua sei hanesan hela, maibé liu minutu 20 ba leten Ponta Leste liu hosi nia treinadór Francisco de Araújo halo mudansa ba jogu iha liña klaran halo Ponta Leste  komesa domina bola.

Bainhira Ponta Leste  domina ona bola mak halo ekipa DIT tenke servisu makas hodi realiza sira nia ambisaun ne’ebé antes ne’e iha katak save pontu tolu.

Ambisaun DIT nian hela de’it hanesan ambisaun tanba iha lina klaran jogadór mediu sira la kontrola bola ho di’ak nune’e bele supplay bola ba avansadu Venceslau (22) no José Santos (10) hodi ameasa rede Ponta Leste nune’e bele rezulta golu, maibé Ponta Leste nia defeza la fó fatin.

Jogu komesa manas liután, nune’e iha minutu 44, Ponta Leste konsege sobu guarda rede ne’ebé guarda hosi Ricardo Nunes liuhosi Jogadór Ricardino Bianco hodi muda kedan rezultadu ba 1-0.

Golu ne’e hanesan golu ikus iha minutu primeira parte nian,  tanba to’o minutu termina laiha tan golu ruma mak akontese ba ekipa rua.

Dolar ba segunda parte ekipa rua nafatin mantein iha pozisaun hodi lansa nafatin kontra no atake ba malu atu buka golu, maibé forsa hosi ekipa rua la dook ba malu. Nune’e la rezulta golu ruma to’o árbitru termina jogu laiha tan golu ruma mak akontese no Ponta Leste lidera jogu ho skore 1-0. 

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here